فائیو جی کی کامیاب نیلامی ڈیجیٹل پاکستان کیلئے بھی سنگِ میل قرار

اسلام آباد: پاکستان نے فائیو جی (5G) اسپیکٹرم کی نیلامی کے ذریعے “ڈیجیٹل پاکستان” کے وژن کی جانب ایک تاریخی کامیابی حاصل کر لی ہے، جس کا اعتراف عالمی ادارے جی ایس ایم ایسوسی ایشن (GSMA) نے اپنی حالیہ رپورٹ میں کیا ہے۔ رپورٹ کے مطابق، پاکستان نے عالمی ڈیجیٹل ترقی کی فہرست میں آخری نمبروں سے چھلانگ لگا کر آٹھویں پوزیشن حاصل کر لی ہے، جو کہ وزارت آئی ٹی اور پی ٹی اے کی مؤثر حکمت عملی کا نتیجہ ہے۔

اسپیکٹرم کی نیلامی میں تین بڑے آپریٹرز نے حصہ لیا اور مجموعی طور پر 142 ارب روپے میں 480 میگاہرٹز اسپیکٹرم حاصل کیا۔ اس پیش رفت کے بعد پاکستان کا مجموعی اسپیکٹرم 2.8 گنا بڑھ کر 750 میگاہرٹز ہو گیا ہے۔ جی ایس ایم اے نے خصوصی طور پر اس بات کو سراہا ہے کہ حکومت نے نیلامی کی ادائیگی ڈالر کے بجائے پاکستانی روپے میں وصول کرنے کا مثبت فیصلہ کیا، جس سے ملکی معیشت پر دباؤ کم ہوا۔

حیرت انگیز طور پر، پاکستان نے اس میدان میں بھارت، ویتنام، جنوبی کوریا، تھائی لینڈ اور انڈونیشیا جیسے ممالک کو پیچھے چھوڑ دیا ہے۔ اگرچہ جاپان، چین اور آسٹریلیا بدستور ٹاپ تین پوزیشنز پر برقرار ہیں، لیکن پاکستان کی آٹھویں پوزیشن خطے میں ایک بڑی تبدیلی کی نوید ہے۔ ماہرین کا کہنا ہے کہ سستی موبائل ڈیوائسز اور انٹرنیٹ سروسز کی فراہمی سے شہریوں کے لیے روزگار کے نئے مواقع پیدا ہوں گے اور ملک میں ڈیجیٹل انقلاب کی راہ ہموار ہوگی۔