عید الفطر سے قبل ملک میں فائیو جی سروس کا آغاز، لائسنس اجرا کی تیاری مکمل

اسلام آباد: عید الفطر سے قبل ملک میں فائیو جی (5G) سروس کا آغاز ہونے جا رہا ہے، پاکستان ٹیلی کمیونیکیشن اتھارٹی نے فائیو جی لائسنسوں کے اجرا کی تیاری مکمل کرلی ہے۔

پی ٹی اے کے مطابق فائیو جی سپیکٹرم حاصل کرنے والی کمپنیوں کو کل لائسنس جاری کیے جائیں گے، اور ٹیلی کام کمپنیوں کو وزیراعظم ہاؤس میں منعقدہ خصوصی تقریب میں یہ لائسنس دیے جائیں گے۔ وزیراعظم شہباز شریف تقریب کے مہمان خصوصی ہوں گے۔

وفاقی وزیر آئی ٹی شزہ فاطمہ خواجہ، چیئرمین پی ٹی اے اور دیگر متعلقہ حکام بھی تقریب میں شریک ہوں گے جبکہ وفاقی وزیر خزانہ محمد اورنگزیب، وفاقی وزیر اطلاعات عطااللہ تارڑ اور دیگر کابینہ ارکان کی شرکت بھی متوقع ہے۔لائسنس حاصل کرنے کے لیے کمپنیوں نے 15 ملین ڈالر کی بینک گارنٹی جمع کروا دی ہے، اور ٹیلی کام کمپنیاں پہلے ہی فائیو جی سروس شروع کرنے کی تیاریاں مکمل کر چکی ہیں۔لائسنس جاری ہونے کے فوراً بعد کمپنیاں اسلام آباد سمیت بڑے شہروں میں فائیو جی سروس لانچ کر دیں گی، جس سے صارفین کو تیز ترین انٹرنیٹ سپیڈ کی سہولت میسر آئے گی۔