فائیو جی سپیکٹرم نیلامی کے بعد بھی سروس لانچ میں رکاوٹیں برقرار

اسلام آباد: پاکستان میں 5G سروسز کے عملی آغاز میں ایک نئی اور غیر متوقع رکاوٹ سامنے آئی ہے۔ ذرائع کے مطابق، ملک میں لاکھوں کی تعداد میں موجود آئی فون (Apple) صارفین تاحال 5G سپورٹ کے لیے مطلوبہ سافٹ ویئر اپڈیٹ پیچ کے منتظر ہیں، جس کے بغیر ان کے فونز مقامی 5G بینڈز کو سپورٹ نہیں کر رہے۔

دوسری جانب، سام سنگ (Samsung) نے اس معاملے میں مثبت پیش رفت کی ہے اور توقع ظاہر کی جا رہی ہے کہ آئندہ دو سے تین ہفتوں میں سام سنگ صارفین کے لیے خصوصی پیچ جاری کر دیا جائے گا۔ ماہرین کا کہنا ہے کہ جب تک موبائل کمپنیاں اپنے ہینڈ سیٹس میں سافٹ ویئر کے ذریعے پاکستان کے مخصوص 5G فریکوئنسی بینڈز کو “ان لاک” نہیں کرتیں، تب تک صارفین تیز ترین انٹرنیٹ سے مستفید نہیں ہو سکیں گے۔

پاکستان ٹیلی کمیونیکیشن اتھارٹی (PTA) اور ٹیلی کام آپریٹرز اس سلسلے میں موبائل کمپنیوں سے مسلسل رابطے میں ہیں۔ اطلاعات ہیں کہ ایپل کے ساتھ حکومتی سطح (State Level) پر رابطہ کرنے کی تجویز بھی زیرِ غور ہے تاکہ اس عمل کو تیز کیا جا سکے۔