پاکستان میں 5 جی سروس فعال، ڈیجیٹل ترقی اور سرمایہ کاری کے نئے دور کا آغاز

اسلام آباد: پاکستان میں ڈیجیٹل ترقی کے ایک نئے دور کا آغاز ہو گیا ہے جہاں ملک بھر میں 5 جی سروسز کا باقاعدہ آغاز کر دیا گیا ہے۔ اس سنگ میل کے حصول میں اسپیشل انویسٹمنٹ فیسیلیٹیشن کونسل (SIFC) کی مؤثر حکمت عملی کو کلیدی قرار دیا جا رہا ہے۔ تازہ ترین رپورٹس کے مطابق، ملک کے بڑے شہروں اور اہم مقامات پر 300 سے زیادہ 5 جی سائٹس فعال ہو چکی ہیں، جن میں جاز (Jazz) کی 180 اور زونگ (Zong) کی 150 سائٹس شامل ہیں۔

حکومتی ذرائع کے مطابق، اس وقت 103 مختلف موبائل برانڈز کی 2,254 سے زائد ڈیوائسز پر 5 جی سروس فراہم کی جا رہی ہے۔ پاکستان سافٹ ویئر ہاؤسز ایسوسی ایشن (P@SHA) نے اس پیش رفت کو ملکی تاریخ کا انقلابی قدم قرار دیتے ہوئے وزیراعظم، وزارتِ آئی ٹی اور پی ٹی اے (PTA) کی کوششوں کو سراہا ہے۔ مشیرِ خزانہ خرم شہزاد کا کہنا ہے کہ 5 جی اسپیکٹرم سے انٹرنیٹ کی رفتار اور معیار میں غیر معمولی اضافہ ہوگا، جس سے ڈیجیٹل اکانومی کو نئی جلا ملے گی۔

اس ٹیکنالوجی کے لیے ہونے والی نیلامی میں تین بڑی بین الاقوامی کمپنیوں اتصالات (Etisalat)، چائنا موبائل اور ویون گروپ (VEON) نے پاکستان میں 50 کروڑ ڈالر سے زائد کی فوری سرمایہ کاری کی ہے۔ مزید برآں، جاز (ویون گروپ) نے آئندہ تین سالوں میں پاکستان میں مزید ایک ارب ڈالر کی سرمایہ کاری کا بڑا اعلان کیا ہے۔ ماہرینِ معیشت کا ماننا ہے کہ یہ بھاری سرمایہ کاری ملکی معیشت کی بحالی اور پائیدار ترقی کی سمت میں ایک واضح اشارہ ہے، جو ٹیکنالوجی کے شعبے میں روزگار کے ہزاروں نئے مواقع پیدا کرے گی۔