لائسنسگ کے بعد فائیو جی انفراسٹرکچر میں اہم پیش رفت

اسلام آباد: پاکستان میں فائیو جی (5G) لائسنسنگ کے عمل کے بعد ٹیلی کام انفراسٹرکچر میں بڑی پیش رفت سامنے آئی ہے۔ ذرائع کے مطابق، ملک کے دو بڑے آپریٹرز جاز (Jazz) اور زونگ (Zong) نے فائیو جی سائٹس کی تنصیب اور انہیں فعال کرنے کے عمل میں تیزی پیدا کر دی ہے۔ جاز نے اب تک 177 جبکہ زونگ نے 150 فائیو جی سائٹس کو کامیابی سے ایکٹو کر دیا ہے۔

ابتدائی مرحلے میں وفاقی دارالحکومت اسلام آباد کے کلیدی مقامات، بشمول ریڈ زون، بلیو ایریا، پارلیمنٹ ہاؤس اور مختلف رہائشی سیکٹرز میں فائیو جی سائٹس فعال کی گئی ہیں۔ اس وقت مارکیٹ میں موجود 103 مختلف برانڈز کی تقریباً 2254 ڈیوائسز پر فائیو جی نیٹ ورک ٹیسٹنگ کے مراحل میں ایکٹو ہے، جس سے صارفین کو مستقبل قریب میں برق رفتار انٹرنیٹ کی سہولت میسر ہوگی۔

تاہم، ٹیکنالوجی کے بڑے ناموں آئی فون (iPhone) اور سام سنگ (Samsung) کے صارفین کو فائیو جی کے مکمل استعمال کے لیے تھوڑا انتظار کرنا ہوگا۔ ذرائع کا کہنا ہے کہ ان کمپنیوں کی جانب سے تاحال فائیو جی نیٹ ورک کے لیے مخصوص سافٹ ویئر ‘پیچ’ فراہم نہیں کیے گئے، جن کی دستیابی کے بعد ان ہینڈ سیٹس پر بھی 5G سروسز باقاعدہ طور پر دستیاب ہوں گی۔