پاک چین زرعی سرمایہ کاری کانفرنس کل اسلام آباد میں منعقد ہوگی

اسلام آباد: زرعی شعبے میں سرمایہ کاری کے فروغ کے لیے پاک چین زرعی سرمایہ کاری کانفرنس کل اسلام آباد میں منعقد ہوگی، جس میں وزرا، پالیسی سازوں اور بزنس کمیونٹی کی بھرپور شرکت متوقع ہے۔

وفاقی وزیر برائے قومی غذائی تحفظ کے مطابق کانفرنس میں 115 چینی اور 165 پاکستانی کمپنیاں شرکت کریں گی، جو زرعی شعبے میں نئی سرمایہ کاری اور مشترکہ منصوبوں پر بات چیت کریں گی۔ وزارتِ غذائی تحفظ کا کہنا ہے کہ کانفرنس کے دوران متعدد مفاہمتی یادداشتوں (ایم او یوز) پر بھی دستخط کیے جائیں گے۔

وزارتِ غذائی تحفظ کے مطابق چینی کمپنیاں پاکستان کے زرعی شعبے میں بھاری سرمایہ کاری لائیں گی، جس سے نہ صرف زرعی پیداوار میں اضافہ ہوگا بلکہ روزگار کے نئے مواقع بھی پیدا ہوں گے۔ حکام کا کہنا ہے کہ پاک چین زرعی سرمایہ کاری کانفرنس سے زرعی شعبے کو نمایاں فروغ ملے گا۔

وفاقی وزیر رانا تنویر حسین نے کہا ہے کہ پاک چین زرعی تعاون سے زراعت جدید خطوط پر استوار ہوگی اور جدید ٹیکنالوجی کے ذریعے کسانوں کی پیداوار میں اضافہ ممکن ہو سکے گا۔ ان کا کہنا تھا کہ یہ کانفرنس کسانوں کی خوشحالی میں اہم کردار ادا کرے گی۔

وزارتِ غذائی تحفظ کے مطابق پاک چین زرعی شراکت داری سے ملکی معیشت کو تقویت ملے گی اور برآمدات میں اضافے کے ساتھ ساتھ فوڈ سیکیورٹی کے اہداف کے حصول میں بھی مدد ملے گی۔