پاکستان کا 2خلابازوں کو تجربات کےلیے خلا میں بھیجنے کافیصلہ،تربیت کےلیے چین روانہ

پاکستان کے خلائی ادارے اسپارکو کے انسانی خلائی مشن پروگرام میں اہم پیشرفت ہوئی ہے۔جس کے تحت 2 خلا بازخرم داؤد اور محمد ذیشان علی کو تجربات کے لیے خلا میں بھیجا جائے گا۔دونوں امیدوار جدید تربیت کے حصول کے لیے چین روانہ ہو گئے ہیں جہاں وہ مستقبل کے مشن کی تیاری کریں گے۔

پاکستان پہلی مرتبہ چینی خلائی اسٹیشن چائنہ اسپیس اسٹیشن کے مشن میں شرکت کی تیاری کر رہا ہے۔ یہ مشن رواں سال کے آخر میں متوقع ہے جس میں ایک پاکستانی خلا باز شین زو مشن کے دوران بطور پے لوڈ ایکسپرٹ اپنی ذمہ داریاں انجام دے گا۔

مشن کے دوران پاکستانی خلا باز مائیکرو گریویٹی میں مختلف سائنسی تجربات کریں گے جن میں میٹیریل سائنس، فلوئڈ فزکس، لائف اور بائیو سائنس، اور بائیو ٹیکنالوجی جیسے اہم شعبے شامل ہوں گے۔

خلا میں جانے والے پائلٹ خرم داؤد  کا کہنا ہے کہ جس طرح پاک چین دوستی بے مثال ہے اسی طرح یہ ایک آغاز ہے ،  یہ دونوں ممالک کا مشترکہ مشن ہے۔جبکہ پائلٹ افتخار حسین نے کہا کہ یہ ہمارے لیے ایک اعزاز کی بات ہے ،یہ مشن پاکستان کے لیے خلائی ریسرچ کے نئے ادوار کھول دے گا۔

وزیراعظم محمد شہباز شریف نے اس پیشرفت کو سراہتے ہوئے سپارکو کی گہرے خلائی تحقیق میں پیش قدمی کو قابل تحسین قرار دیا۔ ۔وزیراعظم کا کہنا تھا کہ انسانی خلائی مشن میں پاکستان کی شمولیت دونوں ممالک کے قریبی تعلقات کا ایک اور عملی مظہر ہے۔