پاکستان کا آئی اے ای اے بورڈ آف گورنرز اجلاس میں جوہری تحفظ و سلامتی کے عزم کا اعادہ

پاکستان اٹامک انرجی کمیشن (PAEC) کے چیئرمین ڈاکٹر راجہ علی رضا انور نے آسٹریا کے دارالحکومت ویانا میں منعقدہ انٹرنیشنل اٹامک انرجی ایجنسی (IAEA) کے بورڈ آف گورنرز کے اعلیٰ سطحی اجلاس میں پاکستان کا قومی بیان پیش کرتے ہوئے ملک کے پُرامن جوہری پروگرام اور عالمی تحفظ و سلامتی کے غیر متزلزل عزم کا اعادہ کیا ہے۔ اپنے خطاب میں چیئرمین پی اے ای سی نے واضح کیا کہ جوہری اور تابکاری تحفظ پر کسی قسم کا سمجھوتہ کیے بغیر ہر ریاست کو اپنے ایٹمی اثاثوں اور تنصیبات کی مکمل ذمہ داری اٹھانی ہوتی ہے، اور یہی اصول پاکستان کے پُرامن جوہری پروگرام کا بنیادی ستون ہے۔

انہوں نے آئی اے ای اے کے ارکان کو بتایا کہ پاکستان گزشتہ پانچ دہائیوں (50 سال) سے اپنی تمام ایٹمی تنصیبات کو عالمی قوانین کے تحت مکمل محفوظ اور کامیاب انداز میں چلا رہا ہے۔ پاکستان نے ‘کنونشن آن نیوکلیئر سیفٹی’ کے دسویں جائزہ اجلاس کی صدارت کی، جبکہ جاری سال 2026ء میں بھی پاکستانی ایٹمی ماہرین نے چین اور فلپائن میں ہونے والی آئی اے ای اے کی عالمی مشقوں میں فعال شرکت کی ہے۔ انہوں نے مزید بتایا کہ پاکستان کا ‘نیشنل انسٹی ٹیوٹ آف سیفٹی اینڈ سکیورٹی’ اور ‘پاکستان سینٹر آف ایکسی لینس فار نیوکلیئر سکیورٹی’ علاقائی مراکز کے طور پر خطے کے دیگر ممالک کو معاونت فراہم کر رہے ہیں اور پاکستان کا جوہری تحفظ کا اندرونی فریم ورک عالمی سطح پر تسلیم شدہ معیارات کے عین مطابق ہے۔