آسکرز پر ’’ون بیٹل آفٹر این ادر‘‘ چھا گئی، 6 ایوارڈ لے اڑی

آسکر ایوارڈز کی تقریب پر فلم ’ون بیٹل آفٹر این ادر‘ چھا گئی، جس نے بہترین فلم سمیت چھ ایوارڈز اپنے نام کیے۔ حالیہ برسوں کے اس کڑے مقابلے میں اس فلم نے ’سنرز‘ جیسی مضبوط حریف کو بھی پیچھے چھوڑ دیا۔ ہدایت کار پال ٹامس اینڈرسن نے اپنے کیریئر کے پہلے تین آسکرز جیتے، جو انہیں امیگریشن اور سفید فام برتری کے موضوعات پر مبنی سیاسی تھرلر ’ون بیٹل‘ پر دیے گئے۔ بہترین اڈاپٹڈ سکرین پلے کا انعام وصول کرتے ہوئے انہوں نے جذباتی انداز میں یہ فلم اپنی اگلی نسل کے نام کی۔ فلم کی کہانی ایک ایسے سابق انقلابی (لیونارڈو ڈی کیپریو) کے گرد گھومتی ہے جو کرنل لاک جا (شان پین) کے خلاف جدوجہد میں مصروف ہے۔

دوسری جانب، رائن کوگلر کی 16 نامزدگیاں حاصل کرنے والی فلم ’سنرز‘ نے چار ایوارڈز جیتے، جن میں بہترین اوریجنل سکرین پلے اور مائیکل بی جارڈن کے لیے بہترین اداکار کا ایوارڈ شامل ہے۔ جارڈن نے فلم میں جڑواں بھائیوں کے پیچیدہ کردار ادا کیے۔ اسی فلم کے لیے آٹم ڈورلڈ آرکاپاؤ نے بہترین سینماٹوگرافی کا ایوارڈ جیت کر یہ اعزاز پانے والی پہلی خاتون ہونے کا ریکارڈ قائم کیا۔ بہترین اداکارہ کا ایوارڈ جیسی بکلی نے فلم ’ہیمنیٹ‘ میں شیکسپیئر کی اہلیہ کا کردار نبھانے پر جیتا، جبکہ ایمی میڈیگن بہترین معاون اداکارہ قرار پائیں۔ تقریب میں نارویجن فلم ’سینٹیمینٹل ویلیو‘ کو بہترین بین الاقوامی فلم اور ’کے پاپ ڈیمن ہنٹرز‘ کو بہترین اینیمیٹڈ فیچر کا ایوارڈ دیا گیا۔ وارنر برادرز اسٹوڈیو مجموعی طور پر 12 ایوارڈز کے ساتھ سرفہرست رہا۔