غزہ پر بنی تین فلمیں آسکر ایوارڈز کے لیے نامزد

نیویارک / جنیوا: اکیڈمی آف موشن پکچر آرٹس اینڈ سائنسز نے 98ویں آسکر ایوارڈز کے لیے نامزدگیوں کا اعلان کر دیا ہے، جس میں غزہ کی جنگ سے متعلق تین مختصر دورانیے کی فلمیں بھی شامل ہیں۔

ان میں سے دو اسرائیلی اور ایک تیونسی فلم ہے۔ تیونس کی نامزد فلم The Voice of Hind Rajab ہے، جسے بہترین بین الاقوامی فیچر فلم کے زمرے میں نامزد کیا گیا۔ یہ ڈاکومنٹری ڈراما پانچ سالہ فلسطینی بچی ہند رجب کی کہانی بیان کرتی ہے، جو مبینہ طور پر گزشتہ سال اسرائیلی فوجیوں کے ہاتھوں غزہ میں شہید ہوئی تھی۔ فلم میں فلسطینی ہلالِ احمر کی کوششیں ڈرامائی انداز میں پیش کی گئی ہیں اور بچی کی حقیقی فون کال کی آڈیو بھی شامل ہے۔

اسرائیل کی مختصر دورانیے کی فلم Butcher’s Stain کو بہترین لائیو ایکشن شارٹ فلم کے لیے نامزد کیا گیا ہے۔ یہ فلم عرب قصاب سمیر کی کہانی بیان کرتی ہے، جس پر 7 اکتوبر 2023 کے حملے میں اغوا شدہ اسرائیلی یرغمالیوں کے پوسٹر ہٹانے کا الزام ہے۔

اسرائیل کی دوسری نامزد مختصر فلم Children No More: Were and Are Gone ہے، جسے بہترین ڈاکیومنٹری شارٹ فلم کے لیے نامزد کیا گیا۔ یہ فلم مارچ 2025 میں تل ابیب میں شروع ہونے والے خاموش احتجاج کو دکھاتی ہے، جہاں مظاہرین غزہ میں مارے گئے بچوں کی تصاویر اٹھاتے ہوئے ہفتہ وار اجتماع کرتے ہیں۔

آسکر کے لیے پیش کی گئی کچھ اسرائیلی فلمیں مسترد کر دی گئی ہیں، جن میں زیادہ تر مواد اسرائیل کی انسانی حمایت کو نمایاں کرنے کی ناکام کوشش سمجھی گئی۔