اوپن اے آئی نے چیٹ جی پی ٹی کا خاص ورژن متعارف کرا دیا

اوپن اے آئی (OpenAI) نے اپنی ٹیکنالوجی کو ایک نئے اور حساس مرحلے میں داخل کرتے ہوئے چیٹ جی پی ٹی کا ایک طاقتور ورژن GPT-5.4-Cyber متعارف کروا دیا ہے، جسے خاص طور پر سائبر سکیورٹی اور ہیکنگ کی صلاحیتوں کو جانچنے کے لیے ڈیزائن کیا گیا ہے۔ اس ماڈل کی سب سے خاص بات یہ ہے کہ اسے روایتی حفاظتی پابندیوں سے آزاد رکھا گیا ہے تاکہ یہ سسٹم میں موجود ان پیچیدہ کمزوریوں کو بھی تلاش کر سکے جنہیں عام اے آئی ماڈلز سیکیورٹی فلٹرز کی وجہ سے نظر انداز کر دیتے ہیں۔

کمپنی کا موقف ہے کہ اس ریلیز کا مقصد سائبر سکیورٹی ماہرین (White Hat Hackers) کو ایک ایسا ہتھیار فراہم کرنا ہے جس کی مدد سے وہ مستقبل کے حملوں کی پہلے سے نشاندہی کر کے بہتر دفاعی حصار تیار کر سکیں۔ تاہم، ماہرین نے خبردار کیا ہے کہ اس قسم کے ماڈلز انٹرنیٹ سکیورٹی کے لیے ایک بڑا چیلنج بن سکتے ہیں کیونکہ یہ پہلے سے نامعلوم (Zero-day) کمزوریوں کو تلاش کرنے کی غیر معمولی صلاحیت رکھتے ہیں۔