اوپن اے آئی اور ایلون مسک کے درمیان تنازع شدت اختیار کر گیا

واشنگٹن: مصنوعی ذہانت (AI) کی عالمی صنعت میں جاری شدید مسابقت اور تنازعات کے دوران اوپن اے آئی (OpenAI) نے اعلان کیا ہے کہ وہ معروف کوڈنگ پلیٹ فارم ’کرسر‘ (Cursor) کو اپنے جدید اے آئی ماڈلز کی مزید فراہمی معطل کر رہا ہے۔

واضح رہے کہ کوڈنگ ٹول ‘کرسر’ تیار کرنے والی کمپنی ایلون مسک کی خلائی ادارے ’اسپیس ایکس‘ (SpaceX) کی ملکیت ہے۔ اوپن اے آئی کی جانب سے اٹھایا گیا یہ قدم کمپنی کے چیف ایگزیکٹو سیم آلٹمین (Sam Altman) اور ایلون مسک کے درمیان برسوں سے جاری تنازع کا شاخسانہ قرار دیا جا رہا ہے۔ اوپن اے آئی نے اپنے بیان میں موقف اختیار کیا کہ اسے ایلون مسک کی زیرِ انتظام کمپنیوں کے ساتھ سابقہ تجربات کی روشنی میں یہ اعتماد حاصل نہیں کہ اس کے ماڈلز کے استعمال کے معاہدوں اور سروس کی شرائط کی مکمل پاسداری کی جائے گی۔

سیم آلٹمین اور ایلون مسک کے درمیان اختلافات نے رواں سال اس وقت سنگین صورتحال اختیار کر لی تھی جب مسک کی جانب سے اوپن اے آئی کے خلاف 150 ارب ڈالر کا سنسنی خیز مقدمہ عدالت میں پیش کیا گیا۔ تجزیہ کاروں کے مطابق ’کرسر‘ کی اے آئی ماڈلز تک رسائی بلاک کرنے سے یہ بات واضح ہو گئی ہے کہ دونوں ارب پتی شخصیات کا تنازع اب صرف قانونی محاذ تک محدود نہیں رہا بلکہ ٹیکنالوجی تک رسائی اور تجارتی جنگ میں تبدیل ہو چکا ہے۔