اوپن اے آئی نے مالی ریکارڈ توڑ دیا، آمدنی تین گنا بڑھ گئی

مصنوعی ذہانت کے معروف پلیٹ فارم اوپن اے آئی نے دعویٰ کیا ہے کہ 2025 میں اس کی سالانہ آمدنی کی رفتار 20 ارب ڈالر سے تجاوز کر گئی ہے، جو گزشتہ سال 6 ارب ڈالر کے مقابلے میں نمایاں اضافہ ہے۔

کمپنی کی چیف فنانشل آفیسر سارہ فرائیئر نے ایک بلاگ پوسٹ میں بتایا کہ آمدنی میں یہ غیر معمولی اضافہ کمپنی کی کمپیوٹنگ صلاحیت میں تیز رفتار توسیع کے ساتھ ہم آہنگ ہے۔

ان کے مطابق اوپن اے آئی کی کمپیوٹنگ پاور 2024 میں 0.6 گیگا واٹ سے بڑھ کر 2025 میں 1.9 گیگا واٹ تک پہنچ گئی ہے۔ مائیکروسافٹ کی معاونت سے چلنے والی اس کمپنی کے روزانہ اور ہفتہ وار متحرک صارفین کی تعداد بھی ریکارڈ سطح پر پہنچ چکی ہے۔

اوپن اے آئی نے مزید بتایا کہ چیٹ جی پی ٹی میں کچھ امریکی صارفین کے لیے اشتہارات دکھانے کا آغاز کیا جا رہا ہے، جس کا مقصد اے آئی ٹیکنالوجی کی ترقی سے جڑے بڑھتے ہوئے اخراجات کو پورا کرنا ہے۔

دوسری جانب، کمپنی کے پالیسی چیف کرس لیہین نے کہا ہے کہ اوپن اے آئی کا پہلا ڈیوائس 2026 کے دوسرے نصف میں متعارف کرانے کا منصوبہ شیڈول کے مطابق جاری ہے۔

سارہ فرائیئر کے مطابق اوپن اے آئی کا پلیٹ فارم متن، تصاویر، آواز، کوڈ اور اے پی آئیز کو یکجا کرتا ہے، جبکہ آئندہ مرحلے میں کمپنی کی توجہ اے آئی ایجنٹس اور ورک فلو آٹومیشن پر مرکوز رہے گی۔

انہوں نے مزید بتایا کہ 2026 میں صحت، سائنس اور کاروباری شعبوں میں اے آئی کے عملی استعمال کو ترجیح دی جائے گی۔ کمپنی بیلنس شیٹ کو ہلکا رکھنے کے لیے شراکت داریوں اور لچکدار معاہدوں پر انحصار کرے گی۔