امریکی سفیر کا اشتعال انگیز بیان، او آئی سی کا ہنگامی اجلاس طلب

جدہ: اسرائیل میں تعینات امریکی سفیر مائیک ہکابی کے اشتعال انگیز بیان پر مسلم ممالک کی نمائندہ تنظیم ‘آرگنائزیشن آف اسلامک کوآپریشن’ (او آئی سی) نے ہنگامی اجلاس طلب کر لیا ہے۔

او آئی سی کی جانب سے جاری کردہ اعلامیے کے مطابق، یہ اہم اجلاس 26 فروری کو منعقد ہوگا جس میں اسرائیل کے حالیہ غیر قانونی اقدامات اور امریکی سفیر کے بیان کے بعد پیدا ہونے والی صورتحال پر غور کیا جائے گا۔ اجلاس کا بنیادی مقصد اسرائیل کی جانب سے دو ریاستی حل (Two-State Solution) کو سبوتاژ کرنے کی کوششوں کے خلاف رکن ممالک کا مشترکہ مؤقف پیش کرنا اور ایک ٹھوس حکمت عملی تیار کرنا ہے۔

واضح رہے کہ امریکی سفیر مائیک ہکابی نے اپنے بیان میں کہا تھا کہ اگر اسرائیل مشرق وسطیٰ کے وسیع علاقوں پر کنٹرول حاصل کر لے تو انہیں اس پر کوئی اعتراض نہیں ہوگا۔ او آئی سی نے اس بیان کو فلسطینیوں کے حقوق پر ‘ڈاکا’ قرار دیتے ہوئے کہا ہے کہ ایسے بیانات سے اسرائیل کو خطے پر غاصبانہ قبضے کی حوصلہ افزائی ملے گی۔ پاکستان سمیت 14 ممالک پہلے ہی اس بیان کو مسترد کر چکے ہیں۔