موٹاپے کے پھیلاؤ کی اہم وجہ دریافت، ماہرین نے خبردار کردیا

جسمانی وزن میں اضافے سے پریشان افراد کے لیے نئی تحقیق میں اہم انکشاف سامنے آیا ہے کہ حد سے زیادہ پراسیس شدہ غذاؤں کا استعمال موٹاپے میں تیزی سے اضافے کی بڑی وجہ بن رہا ہے۔

تحقیق کے مطابق ایسی غذائیں جسم میں چربی بڑھانے، پیٹ نکلنے اور وزن میں غیر معمولی اضافے کا سبب بنتی ہیں۔ ان غذاؤں میں نمک، چینی اور مصنوعی اجزا کی مقدار زیادہ جبکہ فائبر اور دیگر مفید غذائی اجزا کم ہوتے ہیں۔

ان اشیا میں ڈبل روٹی، فاسٹ فوڈ، کیک، مٹھائیاں، نمکین اشیا، ناشتے کے تیار اناج، انسٹنٹ نوڈلز، میٹھے مشروبات، سوڈا اور تیار شدہ گوشت شامل ہیں۔

ماہرین کے مطابق ان غذاؤں میں موجود فرکٹوز نامی مٹھاس جسمانی وزن بڑھانے میں اہم کردار ادا کرتی ہے۔ یہ مٹھاس جگر پر اثر انداز ہوکر چربی کے ذخیرے میں اضافہ اور میٹابولزم کو متاثر کرتی ہے۔

تحقیق میں بتایا گیا کہ ایسے غذائی معمولات سے ہائی بلڈ پریشر، شوگر، کولیسٹرول، امراض قلب اور فالج جیسے خطرات بھی بڑھ جاتے ہیں۔

ماہرین نے مشورہ دیا ہے کہ وزن کو قابو میں رکھنے کے لیے میٹھے مشروبات، سوڈا اور کیک جیسی اشیا کا استعمال کم سے کم کیا جائے۔