نیویارک شدید ترین گرمی کی لپیٹ میں، 2011 کے بعد پہلی بار ریکارڈ توڑ ہیٹ ویو کا الرٹ؛ میئر نے ‘ہیٹ ایمرجنسی’ نافذ کر دی

نیویارک شہر رواں ہفتے ریکارڈ توڑ گرمی کی لپیٹ میں آنے کے لیے تیار ہے، جس کے باعث شہریوں خصوصاً کھلے آسمان تلے کام کرنے والے ملازمین کو شدید مشکلات کا سامنا کرنا پڑ سکتا ہے۔ محکمہ موسمیات کے مطابق جمعرات اور جمعہ کو شہر کا درجہ حرارت 100 ڈگری فارن ہائیٹ (تقریباً 38 ڈگری سیلسیس) سے تجاوز کر سکتا ہے، جبکہ ہوا میں نمی کے تناسب کی وجہ سے گرمی کی شدت (ہیٹ انڈیکس) 112 ڈگری تک محسوس کی جا سکتی ہے۔

نیویارک شہر میں سال 2011 کے بعد پہلی بار مسلسل دو دن تک درجہ حرارت 100 ڈگری سے اوپر جانے کی پیشگوئی کی گئی ہے۔ اس غیر معمولی صورتحال سے نمٹنے کے لیے میئر زوہران ممدانی نے ہنگامی اقدامات کا اعلان کرتے ہوئے ایک تاریخی “ہیٹ ایمرجنسی پلان” نافذ کر دیا ہے۔

محکمہ صحت کی اسسٹنٹ کمشنر کیرولین اولسن کا کہنا ہے کہ “یہ ٹیکساس جیسی شدید گرمی ہے جو عام طور پر نیویارک میں نہیں دیکھی جاتی، اس لیے صورتحال انتہائی سنگین ہے۔” میئر زوہران ممدانی نے شہریوں پر زور دیا ہے کہ وہ بدھ سے گھروں کے اندر رہیں، ایئر کنڈیشننگ کا استعمال کریں اور اپنے پڑوسیوں کی خیر عافیت معلوم کرتے رہیں۔

لائبریریوں، سینیئر سینٹرز اور دیگر ایئر کنڈیشنڈ مقامات کو کولنگ سینٹرز میں تبدیل کر دیا گیا ہے تاکہ شہری شدید گرمی سے پناہ لے سکیں. میئر نے ایک خصوصی ایگزیکٹو آرڈر پر دستخط کیے ہیں جس کا مقصد اسٹریٹ وینڈرز، ڈیلیوری بوائز اور دیہاڑی دار مزدوروں سمیت تقریباً 93,000 آؤٹ ڈور ورکرز کو گرمی کے مضر اثرات سے بچانا ہے۔ ان کے لیے شہر کے مختلف حصوں میں مسٹنگ فینز (پانی کی پھوار والے پنکھے) لگائے جا رہے ہیں.  پبلک سوئمنگ پولز کے اوقات کار میں ایک گھنٹے کا اضافہ کر کے انہیں رات 8 بجے تک کھلا رکھنے کا فیصلہ کیا گیا ہے، جبکہ بچوں کے لیے قریبی فائر اسٹیشنز سے اسپرے کیپ حاصل کر کے فائر ہائیڈرنٹس کو اسپرنکلر میں تبدیل کرنے کی اجازت دی گئی ہے۔

بجلی فراہم کرنے والی کمپنی ‘کون ایڈیسن’ نے بھی کسی بھی ممکنہ تعطل سے نمٹنے کے لیے اپنے ایمرجنسی ریسپانس سینٹر کو فعال کر دیا ہے، کیونکہ شدید گرمی کے باعث پاور گرڈ پر دباؤ بڑھنے کا خدشہ ہے۔