استاد نصرت فتح علی خان کو مداحوں سے بچھڑے 29 برس بیت گئے

روایتی قوالی کو عالمی سطح پر نئی پہچان دینے والے فنِ موسیقی کے بے تاج بادشاہ استاد نصرت فتح علی خان کو اپنے مداحوں سے بچھڑے 29 برس بیت گئے ہیں، مگر ان کی روح پرور آواز اور سروں کا سحر آج بھی ان کے چاہنے والوں کے دلوں میں زندہ ہے۔ 13 اکتوبر 1948ء کو فیصل آباد میں پیدا ہونے والے استاد نصرت فتح علی خان نے قوالی میں جدت، جوش اور کلاسیکی انداز کا ایسا بہترین امتزاج پیش کیا جس نے صوفیانہ کلام کو عالمی موسیقی کے افق پر روشن کر دیا۔ ان کی گائیکی کا فن صرف پاکستان یا برصغیر تک محدود نہیں رہا بلکہ لندن، پیرس، نیویارک اور ٹوکیو سمیت دنیا بھر کے بڑے سٹیجز پر ان کی آواز کا جادو سر چڑھ کر بولا۔

عالمی سطح پر پاکستان کا نام روشن کرنے والے اس عظیم فنکار کو گریمی ایوارڈ کی نامزدگی سے لے کر ورلڈ میوزک ایوارڈ تک متعدد بین الاقوامی اعزازات سے نوازا گیا۔ اپنے فنی کیریئر کے دوران ایک ہزار سے زائد قوالیاں، فلمی گیت اور صوفیانہ کلام ریکارڈ کروا کر گنیز بک آف ورلڈ ریکارڈز میں نام درج کروانے والے استاد نصرت فتح علی خان موسیقی کی ایک ایسی لا فانی وراثت چھوڑ گئے ہیں جو آنے والی تمام نسلوں کے لیے مشعلِ راہ رہے گی۔