اب آپ ٹی وی اسکرین پر نظر آنے والے کھانے کا ذائقہ چکھ سکتے ہیں

جاپان میں ایک حیران کن اور جدید ٹیکنالوجی متعارف کرائی گئی ہے جس کے ذریعے ناظرین اب ٹی وی اسکرین پر دکھائے جانے والے کھانوں کا ذائقہ براہِ راست محسوس کر سکیں گے۔

اس تجرباتی ڈیوائس کو ’ٹیسٹ دی ٹی وی‘ (Taste the TV) یا ٹی ٹی ٹی وی کا نام دیا گیا ہے، جسے میجی یونیورسٹی کے پروفیسر ہومی میاشِتا نے اپنی تحقیقی ٹیم کے تعاون سے تیار کیا ہے۔

رپورٹس کے مطابق یہ ٹی وی ظاہری طور پر ایک عام فلیٹ اسکرین جیسا دکھائی دیتا ہے، تاہم اس میں ایک خصوصی نظام نصب ہے جو دس بنیادی ذائقوں—جیسے میٹھا، کھٹا، نمکین اور دیگر—کو مخصوص تناسب کے ساتھ اسکرین پر منتقل کرتا ہے۔ ناظرین اسکرین پر زبان پھیر کر وہی ذائقہ محسوس کر سکتے ہیں جو اس وقت ٹی وی پر دکھایا جا رہا ہو۔

پروفیسر ہومی میاشِتا کے مطابق اس ٹیکنالوجی کا مقصد محض تفریح فراہم کرنا نہیں بلکہ انسانی حِسی تجربات کو ایک نئی جہت دینا ہے۔ انہوں نے بتایا کہ کورونا وبا کے دوران جب لوگ گھروں تک محدود ہو گئے تھے، اسی دوران یہ خیال سامنے آیا کہ ٹیکنالوجی کے ذریعے دنیا بھر کے مختلف ذائقوں سے رابطہ ممکن بنایا جائے۔

یہ نظام مستقبل میں صارفین کو گھر بیٹھے دنیا کے مختلف کھانوں کا ذائقہ آزمانے کا موقع فراہم کر سکتا ہے۔ ابتدائی پروٹوٹائپ گزشتہ برس تیار کیا گیا تھا، جبکہ اس کے کمرشل ورژن کی ممکنہ قیمت ایک لاکھ جاپانی ین (تقریباً 639 امریکی ڈالر) رکھی جا سکتی ہے۔ تاہم فی الحال یہ ڈیوائس عام صارفین کے لیے دستیاب نہیں اور مزید جانچ اور بہتری کے مراحل سے گزر رہی ہے۔

ماہرین کا کہنا ہے کہ اس ٹیکنالوجی کے استعمال کے امکانات صرف ٹی وی تک محدود نہیں رہیں گے، بلکہ مستقبل میں اسے آن لائن کوکنگ کلاسز، ریستورانوں کی ورچوئل مارکیٹنگ اور ذائقے کی بنیاد پر فاصلاتی تعلیم کے لیے بھی استعمال کیا جا سکے گا۔