اب روبوٹ بھی انسانوں کی طرح ’’درد‘‘ محسوس کر سکیں‌ گے!

اب تک روبوٹس مختلف شعبوں میں انسانوں کی جگہ تو لے رہے تھے، مگر وہ انسانی حِسّیات خصوصاً درد کے احساس سے محروم تھے۔ تاہم اب چین میں تیار کی گئی ایک نئی مصنوعی جلد روبوٹس کو انسانوں کی طرح لمس اور درد محسوس کرنے کے قابل بنا دے گی۔

غیر ملکی میڈیا کے مطابق ہانگ کانگ کی سٹی یونیورسٹی کے انجینئر یو یوگاؤ کی قیادت میں سائنسدانوں نے ایسی نیورومورفک مصنوعی جلد تیار کی ہے جو انسانی اعصابی نظام کی نقل کرتی ہے۔ یہ جلد چار فعال تہوں پر مشتمل ہے جو لمس کو برقی سگنلز میں تبدیل کرتی ہے، بالکل اسی طرح جیسے انسانی اعصاب دماغ کو پیغام بھیجتے ہیں۔

سائنسدانوں کے مطابق ہلکے دباؤ کی صورت میں روبوٹ اسے عام لمس سمجھے گا، جبکہ دباؤ ایک خاص حد سے بڑھنے پر وہ اسے درد کے طور پر محسوس کرے گا اور انسانوں جیسا ردِعمل دے گا۔ مثال کے طور پر اگر روبوٹ کسی نوکیلی یا گرم چیز کو چھوئے تو وہ فوراً اپنا ہاتھ پیچھے ہٹا لے گا۔

اس ٹیکنالوجی کی سب سے نمایاں خصوصیت اس کا ریفلیکس سسٹم ہے، جس کے تحت شدید درد یا چوٹ کی صورت میں سگنل براہِ راست روبوٹ کے موٹرز کو بھیجا جاتا ہے، اور دماغی ہدایات کے بغیر ہی فوری حرکت ممکن ہو جاتی ہے۔

ماہرین کے مطابق یہ ایجاد مستقبل میں ہیلتھ کیئر، روبوٹک سرجری، صنعتی کاموں اور انسانی تعامل کے شعبوں میں انقلابی تبدیلیاں لا سکتی ہے، جہاں محفوظ اور حساس روبوٹس کی ضرورت تیزی سے بڑھ رہی ہے۔