اب اپنی اصل عمر کی نظر آنے لگی ہوں: عینا آصف

شوبز انڈسٹری کی معروف نوجوان اداکارہ عینا آصف نے اپنی عمر اور ذاتی زندگی سے متعلق گفتگو کرتے ہوئے کہا ہے کہ اب وہ اپنی اصل عمر کی نظر آنے لگی ہیں۔ ڈرامہ سیریل مائی رے میں شاندار اداکاری سے شہرت حاصل کرنے والی عینا آصف نے ایک حالیہ انٹرویو میں بتایا کہ اب جب ان کی عمر 17 سال ہو چکی ہے تو وہ خود کو اپنی عمر کے مطابق محسوس کرتی ہیں، تاہم ماضی میں انہیں لگتا تھا کہ وہ اپنی عمر سے بڑی دکھائی دیتی ہیں۔

عینا آصف کا کہنا تھا کہ بچپن میں جب وہ اپنے ہم عمر بچوں کے ساتھ بیٹھتی تھیں تو انہیں محسوس ہوتا تھا کہ وہ اپنی عمر کی نہیں لگتیں۔ اگرچہ وہ 2011 سے شوبز انڈسٹری کا حصہ ہیں، لیکن اس کے باوجود کئی لوگ انہیں سنجیدگی سے نہیں لیتے، جو ان کے لیے مایوس کن بات رہی ہے۔

اداکارہ نے اپنی والدہ کی بھرپور حمایت کو سراہتے ہوئے کہا کہ ان کی والدہ نے کیریئر اور ذاتی زندگی کے ہر مرحلے پر ان کا ساتھ دیا۔ انہوں نے سوشل میڈیا پر ہونے والی تنقید کا ذکر کرتے ہوئے بتایا کہ ایک پوسٹ میں ان کا موازنہ ایک کارٹون کردار سے کیا گیا، جو ابتدا میں مثبت لگا، مگر بعد میں احساس ہوا کہ یہ تضحیک تھی اور زیادہ تر تبصرے مذاق اڑانے پر مبنی تھے۔

عینا آصف کا کہنا تھا کہ لوگ یہ نہیں دیکھتے کہ وہ کم عمر ہیں اور بغیر سوچے سمجھے منفی تبصرے شروع کر دیتے ہیں، جو ذہنی طور پر تکلیف دہ ثابت ہوتے ہیں۔