معروف اداکارہ کا 12 سال کی عمر میں شادی کرنے کا اعتراف

پاکستانی شوبز انڈسٹری کی سینئر اداکارہ نوشابہ بی بی نے اپنی کم عمری میں شادی اور ماں بننے کے بارے میں کھل کر بات کی ہے۔ پی ٹی وی کی معروف اداکارہ، جنہیں پشتون کرداروں میں اداکاری کے حوالے سے خاص طور پر یاد کیا جاتا ہے، نے ایک حالیہ انٹرویو میں بتایا کہ ان کی شادی 12 سال کی عمر میں ہوئی اور 14 سال کی عمر میں وہ ماں بن گئی تھیں۔

نوشابہ بی بی کا تعلق سوات سے ہے اور انہوں نے پشتو ریڈیو اور پی ٹی وی میں کئی دہائیوں تک خدمات انجام دی ہیں۔ ان کی شائستگی، خوش گفتاری اور روایتی انداز نے انہیں خیبر پختونخوا میں خاص شہرت دی ہے۔

اداکارہ نے کہا کہ انہیں ملازمت یا کیریئر کے لیے وقت نہیں ملا کیونکہ شادی 12 سال کی عمر میں ہو گئی تھی، اور اسی دوران انہوں نے ٹیلی ویژن پر کام بھی شروع کر دیا۔ انہوں نے اپنے انٹرویو میں بتایا کہ شادی کی تقریب کے دوران انہیں ایک لپ اسٹک دی گئی، جس کی وجہ سے وہ سب کچھ بھول گئی، اور خوشی خوشی سہیلیوں کے درمیان شادی کے بندھن میں بندھ گئیں۔

انہوں نے مزید کہا کہ اس وقت بچوں کو شادی کے مفہوم کا اندازہ بھی نہیں ہوتا تھا۔ اداکارہ کے مطابق ان کا شوہر ان کے اداکاری کے کیریئر میں بھرپور ساتھ دینے والا رہا، جبکہ ان کے والد سخت مزاج تھے۔ نوشابہ بی بی کے تین بیٹے اور ایک بیٹی ہیں، اور ان کے شوہر اور خاندانی حمایت نے ان کی ذاتی اور پروفیشنل زندگی میں اہم کردار ادا کیا۔