نیوزی لینڈ نے بھارت میں ون ڈے سیریز جیت کر تاریخ رقم کر دی

اندور: نیوزی لینڈ نے بھارتی سرزمین پر پہلی بار ون ڈے سیریز جیت کر ایک نئی تاریخ رقم کر دی ہے۔ کیویز نے بھارت کو 2-1 سے شکست دیتے ہوئے او ڈی آئی سیریز میں تاریخی کامیابی حاصل کی۔

بھارت کو اپنی سرزمین پر غیر معمولی شکست کا سامنا کرنا پڑا، جہاں ویرات کوہلی کی شاندار اننگز بھی ٹیم کو فتح دلانے کے لیے کافی نہ ہو سکی۔ نیوزی لینڈ کی نسبتاً جونیئر ٹیم نے بھارت کے بڑے سورماؤں کی قلعی کھول دی، روہت شرما، شبمن گل اور کے ایل راہول جیسے کھلاڑی ناکام رہے اور سیریز کی عبرتناک شکست کو روک نہ سکے۔

ویرات کوہلی نے مزاحمت کرتے ہوئے اپنی 54 ویں ون ڈے سنچری اسکور کی اور 124 رنز بنائے، تاہم بھارتی ٹیم نیوزی لینڈ کے حریفانہ کھیل کے آگے ہار سے بچ نہ سکی۔

نیوزی لینڈ نے فیصلہ کن ون ڈے میچ میں بھارت کو 41 رنز سے ہرایا اور یوں پچھلے 37 سالوں میں پہلی بار بھارت میں ون ڈے سیریز اپنے نام کی۔ یہ بھارت کے لیے ایک تاریخی رسوائی کے طور پر یاد رکھی جائے گی۔