امام حسینؓ کی قربانی انصاف اور سچائی کی علامت ہے: ظہران ممدانی

میئر نیویارک سٹی ظہران ممدانی نے یومِ عاشور کے مقدس موقع پر دنیا بھر کے مسلمانوں بالخصوص نیویارک میں مقیم مسلم برادری کے نام اپنے ایک خصوصی پیغام میں کہا ہے کہ نواسہ رسول حضرت امام حسین علیہ السلام کی عظیم قربانی انصاف، حق اور سچائی کی عالمگیر علامت ہے۔

اپنے پیغام میں ظہران ممدانی کا کہنا تھا کہ عاشورہ کا دن دراصل یاد، لازوال قربانی اور گہرے غور و فکر کا دن ہے۔ 10 محرم الحرام کا یہ تاریخی دن ہمیں حضرت امام حسین علیہ السلام کی سچائی، انسانی وقار اور حق کے راستے پر ہر مشکل کے باوجود ثابت قدم رہنے کا درس دیتا ہے۔ انہوں نے مزید کہا کہ امام حسین عالی مقام کی لازوال میراث مضبوط ایمان، بلا تفریق خدمتِ خلق اور ظلم و ناانصافی کے خلاف مسلسل جدوجہد پر مبنی ہے۔میئر نیویارک نے شہر کے تنوع کا ذکر کرتے ہوئے کہا کہ نیویارک سٹی کی اصل طاقت اور خوبصورتی مختلف مذاہب اور ثقافتوں سے تعلق رکھنے والے لوگوں کے باہمی احترام میں چھپی ہے۔ انہوں نے زور دیا کہ ظلم اور ناانصافی کے خلاف مل کر کھڑے ہونا اور ایک دوسرے کے عقائد کا احترام کرنا ہی ہمیں ایک مضبوط معاشرہ بناتا ہے۔