نامناسب زاویے سے تصاویر:نیہا دھوپیا پاپارازیوں پر برس پڑیں

بالی ووڈ کی معروف اداکارہ نیہا دھوپیا ممبئی میں منعقدہ ایک تقریب کے دوران پاپارازی (فوٹوگرافروں) کے غیر پیشہ ورانہ رویے پر شدید برہم ہو گئیں اور انہیں نامناسب زاویوں سے تصاویر اور ویڈیوز بنانے پر سخت الفاظ میں تنبیہ کی ہے۔ اس واقعے کی ویڈیو سوشل میڈیا پر تیزی سے وائرل ہو رہی ہے جس پر نئی بحث چھڑ گئی ہے۔

رپورٹس کے مطابق، تقریب کے دوران جب نیہا دھوپیا نے محسوس کیا کہ کچھ فوٹوگرافرز نامناسب انداز اپنا رہے ہیں، تو وہ خود ان کے پاس گئیں اور ٹوکتے ہوئے کہا کہ فنکاروں کی “پیچھے سے تصاویر” لینا انتہائی غیر مناسب، غیر اخلاقی اور بے ادبانہ عمل ہے۔ انہوں نے واضح کیا کہ وہ بارہا اس معاملے پر اپنا اعتراض ریکارڈ کروا چکی ہیں، لیکن اس کے باوجود بعض پاپارازی اپنی ان حرکتوں سے باز نہیں آ رہے۔

اداکارہ نے شدید غصے کا اظہار کرتے ہوئے کہا کہ یہ رویہ اب مزید برداشت نہیں کیا جائے گا۔ انہوں نے یاد دہانی کروائی کہ فنکار میڈیا کے ساتھ ہمیشہ احترام کا رشتہ برقرار رکھتے ہیں، اس لیے میڈیا کو بھی ان کی ذاتی حدود (Personal Space) اور وقار کا خیال رکھنا چاہیے۔ نیہا دھوپیا نے واضح کیا کہ ان کا یہ احتجاج صرف ان کی اپنی ذات کے لیے نہیں بلکہ ان تمام خواتین فنکاروں کے احترام اور رازداری کے تحفظ کے لیے ہے جنہیں روزانہ اس صورتحال کا سامنا کرنا پڑتا ہے۔

سوشل میڈیا پر وائرل ہونے کے بعد نیہا دھوپیا کے اس دلیرانہ مؤقف کو عوامی سطح اور شوبز شخصیات کی جانب سے بھرپور پزیرائی مل رہی ہے۔ بالی ووڈ اداکارہ سوناکشی سنہا نے بھی نیہا کی حمایت کرتے ہوئے انہیں شاباش دی، جبکہ متعدد صارفین نے مطالبہ کیا ہے کہ پاپارازیوں کو پیشہ ورانہ اخلاقیات کا پابند بنایا جائے اور فنکاروں کی نجی حدود کا احترام سکھایا جائے۔