کینسر سے صحتیاب ہونے میں سورۃ الرحمٰن نے بہت مدد کی: نعمان اعجاز

کراچی: پاکستان کے نامور اور سینئر اداکار نعمان اعجاز نے سنسنی خیز انکشاف کرتے ہوئے بتایا ہے کہ 2024 میں انہیں کینسر کی تشخیص ہوئی تھی اور اس موذی مرض سے نجات اور شفایابی میں سورۃ الرحمٰن کی تلاوت نے کلیدی کردار ادا کیا۔

ایک حالیہ انٹرویو میں اپنے علاج اور ذہنی کیفیت کا احوال بتاتے ہوئے نعمان اعجاز نے بتایا کہ 2024 میں ان کے کان کے قریب ٹیومر میں کینسر کی تشخیص ہوئی تھی۔ اداکار نے کہا کہ بیماری کا علم ہوتے ہی انہوں نے اللہ کے حضور دعا کی اور کہا کہ انہوں نے کبھی کسی کا حق نہیں مارا اور نہ ہی کسی کا برا چاہا ہے۔ انہوں نے اعتراف کیا کہ وہ کیموتھراپی کے دردناک عمل اور ہسپتالوں کے چکروں سے بچنے کے لیے اللہ سے جلد بلاوے کی دعائیں کرتے تھے تاکہ ان کا خاندان تکلیف سے بچ سکے۔

نعمان اعجاز کے مطابق، جب ان کے ایک گہرے دوست کو بیماری کا علم ہوا تو انہوں نے روزانہ سورۃ الرحمٰن پڑھنے کا مشورہ دیا۔ انہوں نے کہا کہ “اس دن سے لے کر آج تک میں باقاعدگی سے سورۃ الرحمٰن پڑھتا ہوں، اور مجھے پختہ یقین ہے کہ مجھے کینسر سے بچانے میں سورۃ الرحمٰن کا بہت بڑا معجزانہ کردار ہے।”

اداکار نے بتایا کہ ان کا کامیاب آپریشن ہوا جس کے بعد ٹیومر نکال دیا گیا۔ 23 جولائی 2024 کو ان کی پہلی کیموتھراپی ہونا طے تھی، تاہم 22 جولائی کو ڈاکٹرز نے حتمی معائنے کے بعد بتایا کہ ان کے جسم میں کینسر کے کوئی اثرات باقی نہیں رہے، جس کے باعث کیموتھراپی کی ضرورت پیش نہیں آئی۔