آخری لمحے میں ایونٹ سے نکال دیا، نہ وضاحت دی اور نہ ہی معافی مانگی: نصیرالدین

ممبئی: بھارتی سینما کے معروف اداکار نصیرالدین شاہ نے دعویٰ کیا ہے کہ انہیں ممبئی یونیورسٹی کے اردو ڈیپارٹمنٹ کے ایونٹ سے آخری لمحے میں بلاوجہ نکال دیا گیا، اور نہ تو انہیں کوئی وضاحت دی گئی اور نہ ہی معافی مانگی گئی۔

نصیرالدین شاہ نے انڈین ایکسپریس میں کہا کہ یہ تجربہ ان کے لیے انتہائی توہین آمیز اور مایوس کن تھا کیونکہ وہ طلبا سے بات چیت کے لیے بہت پرجوش تھے۔

اداکار نے مزید کہا کہ یونیورسٹی نے سامعین کو بتایا کہ انہوں نے ایونٹ میں شرکت سے انکار کیا، جبکہ حقیقت میں انہیں بغیر کسی وجہ کے نکال دیا گیا۔ انہوں نے یونیورسٹی کے اس رویے کو چیلنج کرتے ہوئے کہا: “اگر کسی افسر کا خیال ہے کہ میں اپنے ملک کے خلاف بات کرتا ہوں، تو وہ صرف ایک مثال پیش کرے۔”

نصیرالدین شاہ کو 1980 کی دہائی میں ہندی سینما کے آرٹ ہاؤس فلمز میں نمایاں کرداروں کے لیے سراہا گیا، جن میں منڈی، نشانت، آکروش، جانے بھی دو یارو، معصوم اور سپرش شامل ہیں۔

اداکار کی آئندہ فلمیں بھی جلد ریلیز ہونے والی ہیں، جن میں Assi 20 فروری کو سینما گھروں میں اور امتياز علی کی نئی فلم جون میں ریلیز ہوگی۔