ناسا کا خلائی جہاز 14 سال بعد واپسی کے قریب، ملبہ زمین پر گرے گا

امریکی خلائی ادارے ناسا کا تقریباً 1300 پاؤنڈ (600 کلوگرام) وزنی خلائی جہاز وین ایلن پروب اے (Van Allen Probe A) تقریباً 14 سال بعد زمین کے ماحول میں دوبارہ داخل ہونے والا ہے۔

امریکی سپیس فورس کے مطابق یہ خلائی جہاز آج شام 7:45 بجے (EDT) زمین کے ماحول میں داخل ہونے کی توقع ہے۔

ناسا کے مطابق خلائی جہاز کا زیادہ تر حصہ زمین کے ماحول میں داخل ہوتے وقت جل کر ختم ہو جائے گا، اور ملبے سے کسی انسان کو نقصان پہنچنے کا امکان انتہائی کم ہے، جس کا تخمینہ تقریباً 1 میں 4200 بتایا گیا ہے۔

ادارے نے یہ نہیں بتایا کہ سیٹلائٹ یا اس کا ملبہ زمین کے کس مقام پر گرے گا، تاہم امکان ہے کہ زیادہ تر حصہ سمندر میں گرے گا۔ یہ مشنز خلائی موسم کو سمجھنے میں اہم کردار ادا کرتے رہے ہیں۔

ناسا نے 2019 میں دونوں پروبز کو غیر فعال کر دیا تھا جب ان کا ایندھن ختم ہو گیا اور وہ سورج کی روشنی حاصل کرنے کے لیے سولر پینلز مزید نہیں گھما سکتے تھے۔

وین ایلن پروب بی ابھی تک مدار میں موجود ہے اور اس کے 2030ء سے پہلے زمین کے ماحول میں داخل ہونے کی توقع نہیں ہے۔ یاد رہے کہ دونوں پروبز کو 30 اگست 2012ء کو زمین کے گرد موجود ریڈی ایشن بیلٹس کے مطالعے کے لیے خلاء میں بھیجا گیا تھا۔