جیمز ویب سے 100 گنا وسیع مشاہداتی ٹیلی سکوپ ’رومن‘ خلا میں روانہ

فلوریڈا/واشنگٹن: امریکی خلائی ادارے ناسا نے کائنات کے پراسرار رازوں، تاریک توانائی (Dark Energy)، اور دیگر ستاروں کے گرد موجود سیاروں کا کھوج لگانے کے لیے اپنی جدید ترین ’رومن سپیس ٹیلی سکوپ‘ کو خلا میں روانہ کر دیا ہے۔

سپیس ایکس (SpaceX) کے طاقتور ’فالکن ہیوی‘ راکٹ کے ذریعے کیپ کیناویرل سے خلا میں بھیجی گئی اس 4.3 ارب ڈالر مالیت کی دوربین کو زمین سے تقریباً 16 لاکھ کلومیٹر دور ل his L2 مشاہداتی مقام کی طرف بھیجا گیا ہے، جہاں جیمز ویب سپیس ٹیلی سکوپ بھی پہلے سے موجود ہے۔ ناسا کی پہلی چیف ماہرِ فلکیات آنجہانی نینسی گریس رومن کے نام سے منسوب بس کے سائز کی یہ دوربین تقریباً تین ماہ میں اپنی منزل پر پہنچے گی۔ روانگی کے چند منٹ بعد ہی فالکن ہیوی کے دونوں سائیڈ بوسٹرز کامیابی کے ساتھ واپس کیپ کیناویرل میں لینڈ کر گئے جبکہ دوربین راکٹ سے کامیابی کے ساتھ الگ ہو کر اپنے سفر پر گامزن ہو گئی۔

ناسا کے مطابق رومن ٹیلی سکوپ کا مشاہداتی فیلڈ ہبل ٹیلی سکوپ سے 100 گنا زیادہ وسیع ہے۔ اس کی سب سے بڑی خصوصیت اس کی بے مثال رفتار ہے؛ ملکی وے کہکشاں کا جو جائزہ رومن صرف ایک ماہ میں مکمل کرے گی، ہبل کو وہی کام کرنے میں ایک صدی کا وقت درکار ہوتا۔ ناسا کی سائنس مشن ڈائریکٹر نکی فاکس کے مطابق یہ مشن ہزاروں سپرنووا، دسیوں ہزار سیارے اور اربوں کہکشائیں دریافت کرے گا۔ رومن ٹیلی سکوپ، جیمز ویب اور یورپی ایجنسی کے ’یوکلڈ‘ مشن کے ساتھ مل کر کائنات کو تیزی سے پھیلانے والی خفیہ اور پراسرار تاریک توانائی کے رازوں سے پردہ اٹھانے میں مدد فراہم کرے گی۔