غیر معمولی سرد موسم کے باعث آرٹیمس ٹو مشن کی آزمائش مؤخر

واشنگٹن – امریکی خلائی ادارے ناسا نے غیر معمولی سرد موسم کے باعث آرٹیمس ٹو مشن کی لانچ مؤخر کر دی ہے، جو ناسا کے 50 برس کے عرصے میں چاند پر انسان بھیجنے کا پہلا مشن ہے۔

ناسا کے مطابق فلوریڈا میں آنے والی نایاب آرکٹک سرد لہر کی وجہ سے مشن کی لانچنگ شیڈول کے مطابق ممکن نہ رہا۔ اب عملے کے ساتھ پہلی انسانی چاند پرواز کی لانچنگ 8 فروری سے پہلے نہیں ہو سکے گی، جبکہ یہ تاریخ پہلے 6 فروری مقرر تھی۔

ناسا نے ہفتے کے روز 98 میٹر (322 فٹ) طویل اسپیس لانچ سسٹم (SLS) راکٹ کے فیولنگ ٹیسٹ کی تیاری مکمل کر رکھی تھی، تاہم نقطہ انجماد سے بھی کم درجہ حرارت کی وجہ سے جمعرات کی رات تمام سرگرمیاں منسوخ کر دی گئیں۔

ناسا کے اہلکاروں نے بتایا کہ اگر موسم سازگار رہا تو اب اہم ڈریس ریہرسل پیر کے روز کی جائے گی تاکہ مشن کی لانچنگ کی تیاری مکمل کی جا سکے۔

یہ مشن انسانیت کے لیے چاند کے ارد گرد تحقیقات اور مستقبل میں چاند پر طویل قیام کی تیاری کے حوالے سے اہم سنگ میل شمار کیا جا رہا ہے۔