ناسا نے چاند پر بھیجے جانیوالا تاریخی انسان بردار مشن ملتوی کردیا

امریکی خلائی ادارے ناسا نے چاند کے گرد انسان بردار تاریخی مشن آرٹیمس 2 کو ایک بار پھر ملتوی کر دیا ہے۔ اس مشن کے تحت پانچ دہائیوں بعد چار خلا بازوں کو چاند کے مدار میں بھیجا جانا تھا۔

ناسا کے مطابق آرٹیمس 2 مشن کو پہلے 8 فروری کو روانہ کیا جانا تھا، تاہم اب اسے مارچ تک مؤخر کر دیا گیا ہے۔ ناسا نے ایک بلاگ پوسٹ میں بتایا کہ یہ فیصلہ لانچ سے قبل ڈریس ریہرسل مکمل ہونے کے بعد کیا گیا۔

بیان میں کہا گیا کہ ریہرسل کے دوران متعدد تکنیکی مسائل سامنے آئے۔ شدید سرد موسم کے باعث ریہرسل تاخیر کا شکار ہوئی جبکہ راکٹ انجن میں ہائیڈروجن لیکج کے مسائل بھی درپیش رہے۔ ناسا کے مطابق مشن کی تاخیر سے حاصل شدہ ڈیٹا کا تفصیلی تجزیہ کیا جائے گا تاکہ اگلی لانچ ریہرسل بہتر انداز میں مکمل کی جا سکے۔

ناسا کے منتظم جیراڈ آئزک مین نے ایکس (سابقہ ٹوئٹر) پر بتایا کہ چونکہ ایس ایل ایس راکٹ کو آخری بار تین سال قبل آرٹیمس ون مشن کے لیے لانچ کیا گیا تھا، اس لیے تکنیکی چیلنجز کی توقع پہلے سے موجود تھی، اور اسی مقصد کے تحت ریہرسل کی گئی تاکہ ممکنہ مسائل سامنے آ سکیں۔

واضح رہے کہ ناسا نے آخری مرتبہ 1972 میں اپولو پروگرام کے تحت انسان بردار مشن چاند پر بھیجا تھا۔ آرٹیمس 2 ایک 10 روزہ مشن ہوگا جس میں چار خلا باز اورین اسپیس کرافٹ میں نصب لائف سپورٹ سسٹمز کی جانچ کریں گے تاکہ مستقبل میں طویل دورانیے کے مشنز کی راہ ہموار کی جا سکے۔

یہ مشن پہلے دو بار زمین کے مدار میں پرواز کرے گا اور بعد ازاں چاند کے اُس حصے کی جانب روانہ ہوگا جو زمین سے نظر نہیں آتا۔ اگرچہ خلا باز چاند کی سطح پر نہیں اتریں گے، تاہم یہ 1972 کے بعد پہلا موقع ہوگا جب انسان زمین کے نچلے مدار سے باہر سفر کرے گا۔