آرٹیمس 2 مشن: 5 دہائیوں بعد پہلی بار انسان چاند کے مدار میں جانے کیلئے تیار

فلوریڈا، امریکہ: امریکی خلائی ادارے ناسا نے آرٹیمس 2 مشن کی لانچنگ کے تمام انتظامات مکمل کر لیے ہیں۔ یہ تاریخی مشن فلوریڈا کے کینیڈی اسپیس سینٹر سے مقامی وقت کے مطابق شام 6 بج کر 24 منٹ (پاکستانی وقت کے مطابق رات 3 بج کر 24 منٹ) پر روانہ ہوگا۔ اس مشن میں 4 خلا باز شامل ہیں جو اورین اسپیس کرافٹ اور طاقتور ترین اسپیس لانچ سسٹم (SLS) راکٹ کے ذریعے چاند کے مدار تک پہنچیں گے۔

ناسا حکام کے مطابق، موسم اب تک سازگار ہے اور لانچنگ کو لائیو اسٹریم کیا جائے گا۔ یہ مشن پہلے زمین کے مدار میں دو چکر لگائے گا اور پھر چاند کے اس دور افتادہ حصے (Far Side) کی جانب بڑھے گا جو زمین سے نظر نہیں آتا۔ اگرچہ یہ خلا باز چاند کی سطح پر قدم نہیں رکھیں گے، لیکن یہ مشن 2027ء میں شیڈول آرٹیمس 3 کی کامیابی کے لیے ریڑھ کی ہڈی ثابت ہوگا، جس کے تحت انسان دوبارہ چاند کی سرزمین پر اترے گا۔

یاد رہے کہ یہ مشن پہلے فروری 2026ء میں روانہ ہونا تھا، مگر تکنیکی وجوہات کی بنا پر اسے یکم اپریل تک ملتوی کیا گیا تھا۔ نومبر 2022ء میں آرٹیمس 1 (بغیر انسان) کی کامیابی کے بعد اب انسانوں کی باری ہے کہ وہ گہرے خلا (Deep Space) کے اسرار و رموز جان سکیں۔