’میں تمہیں ماروں گا‘ نانا پاٹیکر نے پنکج ترپاٹھی سے ایسا کیوں کہا؟

بالی ووڈ کے معروف اداکار نانا پاٹیکر نے انکشاف کیا ہے کہ انہوں نے اداکار پنکج ترپاٹھی کو ایک بار سخت انداز میں وارننگ کیوں دی تھی۔

ایک حالیہ انٹرویو میں نانا پاٹیکر نے بتایا کہ وہ رجنی کانت کے ساتھ فلم کالا کی شوٹنگ کر رہے تھے، جہاں پنکج ترپاٹھی ایک پولیس افسر کے مختصر کردار میں نظر آ رہے تھے۔

نانا پاٹیکر کے مطابق جب انہوں نے ترپاٹھی سے پوچھا کہ وہ اس چھوٹے کردار میں کیوں کام کر رہے ہیں تو انہوں نے جواب دیا کہ وہ بڑے اداکاروں کے ساتھ کام کرنے کا موقع ضائع نہیں کرنا چاہتے تھے۔اس پر نانا پاٹیکر نے انہیں کہا کہ آئندہ ایسے مختصر کردار مت کریں، کیونکہ ان جیسا باصلاحیت اداکار بہتر اور نمایاں کرداروں کا مستحق ہے۔نانا پاٹیکر کی یہ وارننگ دراصل پنکج ترپاٹھی کی صلاحیتوں پر اعتماد کا اظہار تھی، جو بعد میں درست ثابت ہوا۔واضح رہے کہ پنکج ترپاٹھی نے اپنی شاندار اداکاری کے ذریعے فلموں اور ویب سیریز میں ایک منفرد مقام حاصل کیا ہے، اور چھوٹے کرداروں سے مرکزی کرداروں تک ان کا سفر ان کی مسلسل محنت اور صلاحیتوں کی عکاسی کرتا ہے۔