نانا پاٹیکر غصے میں تقریب چھوڑ کر چلے گئے، ویڈیو وائرل

نئی دہلی: سینئر بالی ووڈ اداکار نانا پاٹیکر فلم کے ٹریلر لانچ ایونٹ میں تاخیر پر ناراض ہو کر تقریب چھوڑ کر چلے گئے، جس کی ویڈیو سوشل میڈیا پر وائرل ہو گئی۔

شاہد کپور کی آنے والی فلم ’او رومیو‘ کے ٹریلر لانچ کے دوران اس وقت غیر متوقع صورتحال پیدا ہو گئی جب نانا پاٹیکر تقریب کے آغاز میں تاخیر پر برہم ہو گئے۔ ان کی اچانک روانگی نے ایونٹ میں موجود شرکاء اور میڈیا کی توجہ حاصل کر لی۔

ذرائع کے مطابق نانا پاٹیکر ٹریلر لانچ شروع ہونے سے تقریباً ایک گھنٹہ قبل ایونٹ میں پہنچ چکے تھے، تاہم پروگرام کے آغاز میں مسلسل تاخیر کے باعث وہ مزید انتظار نہ کر سکے اور خاموشی سے تقریب سے روانہ ہو گئے۔ ایونٹ میں موجود دیگر مہمانوں اور فلم کی کاسٹ کو بھی طویل انتظار کا سامنا کرنا پڑا۔

اس معاملے پر فلم کے ہدایتکار وشال بھردواج نے میڈیا سے گفتگو کرتے ہوئے نانا پاٹیکر کے رویے پر تبصرہ کیا۔ انہوں نے کہا کہ نانا پاٹیکر کے ساتھ ان کی دوستی 27 برس پرانی ہے، تاہم یہ ان کی پہلی پیشہ ورانہ شراکت داری ہے۔

وشال بھردواج کا کہنا تھا کہ نانا پاٹیکر نے اپنے مخصوص انداز میں کہا،
“مجھے ایک گھنٹہ انتظار کروایا گیا ہے، میں جا رہا ہوں۔”
انہوں نے مزید کہا کہ یہ نانا پاٹیکر کی شخصیت کا حصہ ہے، اسی لیے کسی نے اس پر اعتراض نہیں کیا۔