ایران کی صورتحال: مجلس وحدت مسلمین کا غزہ بورڈ آف پیس سے نکلنے اور امریکی سفارتخانے بند کرنے کا مطالبہ

کراچی: مجلس وحدت مسلمین پاکستان نے رہبر معظم سید علی خامنہ ای کی شہادت پر ملک گیر احتجاج کا اعلان کرتے ہوئے امریکی سفارتخانوں کو بند کرنے اور سفیروں کو ملک بدر کرنے جبکہ غزہ بورڈ آف پیس سے فی الفور نکلنے کا مطالبہ کیا ہے۔

ترجمان مجلس وحدت مسلمین پاکستان کے مطابق ایران پر امریکہ اور اسرائیل کے حملوں کے نتیجے میں رہبر معظم، ان کے اہل خانہ، ایرانی اعلیٰ عہدیداران اور ایک اسکول میں معصوم بچیوں کی شہادت پر ملک بھر میں پُرامن احتجاجی ریلیاں نکالی گئیں۔ تاہم ان ریلیوں کے دوران ریاستی طاقت کے استعمال کی شدید مذمت کی گئی۔

ترجمان کے مطابق ملک کے مختلف شہروں خصوصاً کراچی، گلگت، سکردو، اسلام آباد اور لاہور میں احتجاجی مظاہروں کے دوران 36 عمائدین شہید، 205 افراد زخمی جبکہ سیکڑوں افراد کو گرفتار کیا گیا۔ الزام عائد کیا گیا کہ خواتین کو بھی گولیوں کا نشانہ بنایا گیا۔

بیان میں کہا گیا کہ ریاستی طاقت کا استعمال شہریوں کے جان و مال کے تحفظ کے لیے ہونا چاہیے نہ کہ ان کے خلاف۔ پُرامن مظاہرین پر فائرنگ اور بڑے پیمانے پر گرفتاریاں کسی بھی مہذب معاشرے میں قابل قبول نہیں۔

مجلس وحدت مسلمین نے مطالبہ کیا کہ ان واقعات کی فوری، شفاف اور غیر جانبدارانہ تحقیقات کرائی جائیں، زخمیوں کو مکمل طبی سہولیات فراہم کی جائیں اور بلاجواز گرفتار افراد کو فوری رہا کیا جائے۔ تنظیم نے یہ بھی مطالبہ کیا کہ پیر کے روز سرکاری سطح پر یوم سوگ منانے کا اعلان کیا جائے اور پاکستان فوری طور پر بورڈ آف پیس سے علیحدگی اختیار کرے۔