پاکستان نے پہلی ویکسین پالیسی تیارکرلی,مصطفیٰ کمال

کراچی: مصطفیٰ کمال نے کہا ہے کہ ویکسین کی تیاری پورے شعبہ صحت کے لیے اہمیت رکھتی ہے اور 24 کروڑ لوگوں کے ملک کے لیے مقامی ویکسین تیاری ایک بڑا چیلنج ہے۔

انہوں نے بتایا کہ ہر سال آبادی میں 60 لاکھ سے زیادہ اضافہ ہوتا ہے، اس لیے ضروری ہے کہ پاکستان خود سے ویکسین تیار کرے۔ مصطفیٰ کمال نے کہا کہ ہمارا ہدف 2030 تک ویکسین کی درآمد یا بیرون ملک انحصار کو ختم کرنا ہے، لیکن ہمیں 2030 کا انتظار نہیں کرنا بلکہ اپنی استعداد اور ویکسین تیاری کی صلاحیت فوراً بڑھانی ہوگی۔

مصطفیٰ کمال نے کہا کہ انفراسٹرکچر کی کمی نہیں ہے، قومی ادارہ صحت جیسے مضبوط ادارے موجود ہیں، اور ویکسین کی تیاری یا خرید و فروخت کوئی منافع بخش کاروبار نہیں ہے۔

انہوں نے مزید کہا کہ ویکسین کی تیاری کے لیے اچھے پارٹنرز کی ضرورت ہے اور اس سلسلے میں پاکستان نے چین، سعودی عرب اور انڈونیشیا جیسے ممالک سے تعاون حاصل کیا ہے۔ ان کے مطابق سعودی عرب 10 سال سے ویکسین کی تیاری کے تجربے سے گزر رہا ہے، جس سے ہمارے لیے رہنمائی حاصل ہوگی۔