ملک میں ایچ آئی وی ایڈز کے کتنے مریض موجود،وفاقی وزیر صحت نے آگاہ کر دیا

اسلام آباد: وفاقی وزیر صحت سید مصطفیٰ کمال نے قومی اسمبلی کے اجلاس کے دوران وقفہ سوالات میں ملک میں ایچ آئی وی (HIV) ایڈز کے رجسٹرڈ مریضوں کی تفصیلات ایوان میں پیش کر دیں۔ وفاقی وزیر نے بتایا کہ نیشنل ایڈز کنٹرول پروگرام (NACP) کے تحت پاکستان میں اس وقت مجموعی طور پر 84 ہزار 421 مریض رجسٹرڈ ہیں۔

ایوان کو آگاہ کیا گیا کہ ایڈز کے مریضوں کی سب سے زیادہ تعداد صوبہ پنجاب اور سندھ میں ریکارڈ کی گئی ہے۔ سید مصطفیٰ کمال نے مزید بتایا کہ حکومت اس موذی مرض کی روک تھام اور متاثرہ افراد کی بحالی کے لیے سنجیدہ اقدامات کر رہی ہے۔ اس وقت ملک بھر میں 98 علاج مراکز قائم ہیں جہاں مریضوں کو مکمل طور پر مفت اینٹی ریٹرو وائرل تھراپی (ART) فراہم کی جا رہی ہے۔

وفاقی وزیر نے واضح کیا کہ نیشنل ایڈز کنٹرول پروگرام کے ذریعے نہ صرف رجسٹریشن اور علاج کو یقینی بنایا جا رہا ہے بلکہ اس حوالے سے آگاہی مہم بھی چلائی جا رہی ہے تاکہ معاشرے میں اس مرض سے جڑے منفی تاثر کو ختم کیا جا سکے اور بروقت تشخیص کو ممکن بنایا جا سکے۔