وزیراعظم شہباز شریف کا ملک گیر سادگی و کفایت شعاری مہم کا اعلان

وزیراعظم محمد شہباز شریف نے مشرقِ وسطیٰ میں بڑھتی ہوئی کشیدگی اور عالمی منڈی میں پیٹرولیم مصنوعات کی قیمتوں میں متوقع اضافے کے پیشِ نظر ملک بھر میں جامع سادگی و کفایت شعاری مہم کی باضابطہ منظوری دے دی ہے۔ اسلام آباد میں وزیراعظم کی زیرِ صدارت منعقدہ اعلیٰ سطحی اجلاس میں سرکاری اخراجات میں نمایاں کمی، ایندھن کی بچت اور قومی وسائل کے دانشمندانہ استعمال سے متعلق اہم فیصلے کیے گئے۔ وزیراعظم نے کہا کہ عالمی منڈی میں تیل کی قیمتوں کے باعث پیدا ہونے والے معاشی دباؤ کا مقابلہ کرنے کے لیے سب سے پہلے حکومت اور اشرافیہ سے قربانی کا آغاز کیا جائے گا، جبکہ معاشی طور پر کمزور طبقے کے لیے موٹر سائیکل، رکشہ اور ۸۰۰ سی سی گاڑیوں کے مالکان کو ۱۰۰ روپے فی لیٹر کے حساب سے فیول سبسڈی کی فراہمی جاری ہے۔

اجلاس میں منظور کی گئی پالیسی کے تحت سرکاری گاڑیوں کے لیے ایندھن کے کوٹے میں ۳ ماہ کے لیے ۵۰ فیصد کی بڑی کٹوتی کی منظوری دی گئی ہے، تاہم ایمبولینس، فائر بریگیڈ اور قانون نافذ کرنے والے اداروں کی آپریشنل گاڑیاں اس سے مستثنیٰ ہوں گی۔ اس کے علاوہ مالی سال ۲۰۲۶-۲۷ کے نان ای آر ای بجٹ میں ۵ فیصد کمی، سرکاری سطح پر نئی گاڑیوں کی خریداری اور آئی ٹی کے علاوہ تمام پائیدار اشیا کی خرید پر مکمل پابندی عائد کر دی گئی ہے۔ تمام وزرا، مشیران اور افسران کے بیرونِ ملک سرکاری اسفار پر ۳ ماہ کی پابندی ہو گی اور ناگزیر صورت میں صرف اکانومی کلاس میں سفر کی اجازت ہو گی۔ سرکاری اجلاسوں میں ویڈیو کانفرنسنگ کے استعمال کو ترجیح دی جائے گی اور سرکاری عشائیوں پر مکمل پابندی ہو گی۔

توانائی کی بچت کے حوالے سے ملک بھر میں دکانیں، شاپنگ مالز اور بازار رات ۹ بجے، شادی ہالز رات ۱۰ بجے جبکہ ریستوران اور کیفے رات ۱۱ بجے بند کرنے کا فیصلہ کیا گیا ہے، تاہم فارمیسیز، ہسپتال، پیٹرول پمپس، بیکریوں اور کال سینٹرز کو ان پابندیوں سے استثنا حاصل ہو گا۔ وزیراعظم نے ان اقدامات پر بلاامتیاز عملدرآمد یقینی بنانے کے لیے ہفتہ وار پیش رفت رپورٹ پیش کرنے کی ہدایت کی ہے۔ اجلاس میں نائب وزیراعظم اسحاق ڈار، وفاقی وزرا احد چیمہ، علی پرویز ملک، عطاء اللہ تارڑ اور دیگر اعلیٰ حکام نے شرکت کی۔