’پولیس انہیں مطلوبہ سیکیورٹی دے ہی دے‘، قتل کی سازش کے الزام پر ثاقب چدھڑ کا طنزیہ جواب

لاہور: مسلم لیگ (ن) کے رکن پنجاب اسمبلی ثاقب چدھڑ نے معروف اداکارہ مومنہ اقبال کے شوہر حمزہ حبیب کی جانب سے اپنے خلاف لگائے گئے جان سے مارنے کے تمام الزامات کو مسترد کرتے ہوئے اسے من گھڑت اور “جعلی کہانی” قرار دے دیا ہے۔

سوشل میڈیا پلیٹ فارم انسٹاگرام پر جاری ایک اسٹوری میں ثاقب چدھڑ نے الزامات کی تردید کرتے ہوئے لکھا، “یہ ایک بالکل جعلی کہانی ہے۔ میں انسپکٹر جنرل (آئی جی) پنجاب پولیس سے درخواست کرتا ہوں کہ انہیں فوری طور پر سیکیورٹی فراہم کی جائے، جس کی انہیں اتنی شدت سے ضرورت ہے۔” انہوں نے مزید کہا کہ ان کے پاس عوامی خدمت کے بہت سے کام ہیں اور یہ غیر سنجیدہ معاملہ ان کے لیے کوئی اہمیت نہیں رکھتا۔

واضح رہے کہ اس سے قبل اداکارہ مومنہ اقبال کے شوہر حمزہ حبیب نے ایک بیان میں ایم پی اے ثاقب چدھڑ پر الزام عائد کیا تھا کہ انہوں نے انہیں جانی نقصان پہنچانے کے لیے مبینہ طور پر شوٹرز کا انتظام کر رکھا ہے، جس پر اب لیگی رہنما کی جانب سے باضابطہ وضاحت سامنے آئی ہے۔