لاہور میں سنار کی دکان سے 20 کلو سے زائد سونا غائب ، پولیس نے تفتیش شروع کردی

لاہور کے علاقے اچھرہ میں سنار کی ایک دکان سے 20 کلوگرام سے زائد سونا غائب ہونے کا سنسنی خیز واقعہ سامنے آیا ہے۔ متعدد جیولرز نے اپنا سونا وسیم اختر نامی تاجر کے پاس امانتاً رکھا ہوا تھا، جو کئی روز سے دکان پر موجود نہیں تھا۔

دکانداروں کے مطابق تاجر شیخ وسیم کے طویل غائب رہنے پر شکوک پیدا ہوئے، جس پر تاجروں نے دکان کے تالے توڑ کر لاکر چیک کیا تو 20 کلو سے زائد سونا غائب نکلا۔ متاثرہ دکانداروں کا کہنا ہے کہ غائب شدہ سونے کی مالیت 76 کروڑ روپے سے زائد بنتی ہے۔
اسی دوران شیخ وسیم کی مبینہ طور پر سونا لے کر جاتے ہوئے سی سی ٹی وی فوٹیج بھی منظرعام پر آگئی ہے، جس میں اسے دکان سے بیگ لے کر نکلتے ہوئے دیکھا جا سکتا ہے۔ دکانداروں نے مزید الزام عائد کیا ہے کہ شیخ وسیم 60 لاکھ روپے کی کمیٹی رقم بھی لے کر فرار ہو گیا۔
متاثرہ دکاندار محمد احمد نے واقعے کی رپورٹ کے لیے اچھرہ تھانے میں درخواست جمع کروا دی ہے۔ پولیس کا کہنا ہے کہ واقعے کی مختلف پہلوؤں سے تفتیش شروع کر دی گئی ہے اور ملزم کی تلاش جاری ہے