بھارتی اداکارہ کا معروف ہدایتکار پر جنسی ہراسانی کا الزام

ممبئی/پریاگ راج: مہا کمبھ میلے میں رودرکش فروخت کرتے ہوئے اپنی خوبصورت آنکھوں کی وجہ سے سوشل میڈیا پر وائرل ہونے والی مونا لیزا بھوسلے نے بھارتی فلم انڈسٹری کے معروف ہدایت کار اور اسکرین رائٹر سنوج مشرا پر جنسی ہراسانی اور بدسلوکی کے سنگین الزامات عائد کر دیے ہیں۔ ایک پریس کانفرنس کے دوران مونا لیزا نے دعویٰ کیا کہ فلم ’دی ڈائری آف منی پور‘ کی شوٹنگ کے دوران انہیں ہراساں کیا گیا۔

اداکارہ کے مطابق، نیپال اور دیرادون میں شوٹنگ کے دوران سنوج مشرا نے کئی بار ان کے ساتھ بدتمیزی کی اور انہیں نازیبا طریقے سے چھونے کی کوشش کی۔ مونا لیزا نے الزام لگایا کہ مذکورہ ہدایت کار فلموں میں کام دینے کے بہانے نوجوان لڑکیوں کا استحصال کرتا ہے۔ انہوں نے روتے ہوئے بتایا کہ جب انہوں نے اپنے گھر والوں کو اس بارے میں آگاہ کیا تو انہوں نے ساتھ دینے کے بجائے اسے ‘پہلی فلم’ قرار دے کر خاموش رہنے کا مشورہ دیا۔

مونا لیزا، جنہوں نے حال ہی میں تمام تر سماجی مخالفت کے باوجود اپنے مسلمان دوست محمد فرمان خان سے شادی کی ہے، نے انکشاف کیا کہ اب انہیں اور ان کے شوہر کو سنگین نتائج کی دھمکیاں دی جا رہی ہیں۔ انہوں نے حکام سے مطالبہ کیا ہے کہ ان الزامات کی شفاف تحقیقات کی جائیں اور انہیں تحفظ فراہم کیا جائے۔ واضح رہے کہ مونا لیزا بھوسلے کی شہرت کا آغاز پریاگ راج کے میلے سے ہوا تھا جہاں ان کی تصاویر نے انٹرنیٹ پر دھوم مچا دی تھی۔