وزارت آئی ٹی اور میٹا کا پاکستانی ایس ایم ایز کیلئے سمال بزنس گروتھ اکیڈمی کا آغاز

اسلام آباد: وزارتِ انفارمیشن ٹیکنالوجی و ٹیلی کام اور ٹیکنالوجی کے عالمی ادارے ‘میٹا’ (Meta) نے پاکستان کے چھوٹے اور درمیانے درجے کے کاروباری اداروں (SMEs) کی ڈیجیٹل صلاحیتیں بڑھانے کے لیے “سمال بزنس گروتھ اکیڈمی” کا مشترکہ طور پر آغاز کر دیا ہے۔

وزارتِ آئی ٹی کی جانب سے جاری کردہ بیان کے مطابق اکیڈمی میں شمولیت کے لیے آن لائن رجسٹریشن کا عمل شروع کر دیا گیا ہے، جبکہ باقاعدہ تربیتی سیشنز کا آغاز ستمبر 2026 سے ہوگا۔ اس تعلیمی و تربیتی پروگرام کے تحت ملک بھر کے 1,000 سے زائد چھوٹے اور درمیانے کاروباری اداروں کو بالکل مفت ڈیجیٹل تربیت فراہم کی جائے گی۔ اکیڈمی کا بنیادی مقصد مقامی کاروباری اداروں کو مصنوعی ذہانت (AI) پر مبنی جدید ٹولز اور ڈیجیٹل تکنیکوں کے استعمال میں مہارت فراہم کرنا ہے۔

ترجمان کے مطابق اس پروگرام میں خواتین کی قیادت میں چلنے والے کاروباری اداروں اور نئی صنعت کار خواتین کو خصوصی طور پر شرکت کی دعوت دی گئی ہے۔ تربیت کے دوران شرکا کو فیس بک، انسٹاگرام، اور واٹس ایپ بزنس کی مدد سے ہدف شدہ صارفین تک رسائی، برانڈ ویلیو بڑھانے اور کاروبار کو بین الاقوامی سطح پر فروغ دینے کی عملی مشقیں کروائی جائیں گی۔

وزارتِ آئی ٹی نے تمام خواہشمند کاروباری افراد سے اپیل کی ہے کہ وہ اکیڈمی کی ویب سائٹ پر جا کر جلد از جلد اپنی آن لائن رجسٹریشن مکمل کروائیں۔