جینیفر لوپیز جیسی نظر آنے والی خاتون کی گرفتاری، تصویر نے مداحوں کو حیران کردیا

امریکی ریاست منیسوٹا میں چوری کے الزام میں گرفتار ہونے والی ایک خاتون کی گرفتاری کے وقت لی گئی تصویر (مگ شاٹ) سوشل میڈیا پر وائرل ہوئی تو صارفین ششدر رہ گئے، کیونکہ خاتون کی رنگت اور خدوخال معروف امریکی گلوکارہ و اداکارہ جینیفر لوپیز (Jennifer Lopez) سے غیر معمولی حد تک مشابہت رکھتے ہیں۔ غیر ملکی میڈیا رپورٹس کے مطابق 35 سالہ سیرینا نامی خاتون کو منیسوٹا کے علاقے مونٹیسیلو سے تقریباً 580 ڈالر مالیت کی پاور ٹول بیٹریاں چوری کرنے کے الزام میں حراست میں لیا گیا تھا، جس کے بعد انہوں نے اپنے جرم کا اعتراف بھی کر لیا۔

تاہم، یہ گرفتاری اس وقت وائرل خبر بن گئی جب پولیس کی جانب سے جاری کردہ خاتون کی تصویر انٹرنیٹ پر سامنے آئی۔ سوشل میڈیا صارفین نے سیرینا کی شکل و صورت کو 57 سالہ جینیفر لوپیز کا ہم شکل قرار دیا، جبکہ کئی صارفین نے گلوکارہ کے 2002 کے مشہور گانے ‘جینی فرام دی بلاک’ کا حوالہ دیتے ہوئے دلچسپ اور مزاحیہ تبصرے کیے۔ صارفین نے اس غیر معمولی مشابہت کو ’ناقابلِ یقین‘ قرار دیا۔ رپورٹس کے مطابق سیرینا کو گرفتاری کے اگلے ہی روز ضمانت پر رہا کر دیا گیا تھا۔