مصنوعی ذہانت برطانوی سلامتی کے لیے خطرہ بن گئی ہے ، ایم آئی فائیو چیف

برطانوی خفیہ ادارے ایم آئی فائیو (MI5) کے سربراہ سر کین میکولم نے خبردار کیا ہے کہ مصنوعی ذہانت (AI) برطانیہ کی قومی سلامتی کے لیے نئے اور سنگین خطرات پیدا کر رہی ہے اور دہشت گرد گروہ مہلک حیاتیاتی ہتھیاروں کی تیاری کے لیے اس ٹیکنالوجی کا سہارا لے سکتے ہیں۔ انہوں نے انکشاف کیا کہ برطانیہ کو تاریخ میں پہلی بار ایسے چیلنجز کا سامنا ہے جو انسانی ذہانت سے تجاوز کر سکتے ہیں، جس سے نمٹنے کے لیے ایک خصوصی جائزہ مرکز قائم کر دیا گیا ہے۔ سر کین میکولم نے بتایا کہ گزشتہ دہائی کے دوران دشمن ریاستوں سے متعلق سیکیورٹی کے مسائل میں چار گنا اضافہ ہوا ہے۔ انہوں نے روس کو برطانیہ کا سب سے بڑا سیکیورٹی خطرہ قرار دیتے ہوئے کہا کہ روسی جاسوس اور ان کے پراکسی گروہ برطانیہ اور اس کے اتحادیوں پر حملوں میں ملوث ہیں۔