میکسیکو: خاتون میئر کے اغوا کا ڈرامہ بے نقاب، مالیاتی سکینڈل میں تبدیل

میکسیکو میں ایک خاتون میئر کے مبینہ اغوا کا سنسنی خیز واقعہ پولیس کی تفصیلی تحقیقات کے بعد ایک بڑے مالیاتی اور سیاسی اسکینڈل کی صورت اختیار کر گیا ہے۔ تفتیشی حکام کا دعویٰ ہے کہ اغوا کا یہ پورا ڈراما مبینہ طور پر بلدیاتی فنڈز میں کی گئی بھاری خردبرد کو چھپانے کے لیے رچایا گیا تھا۔

غیر ملکی میڈیا رپورٹس کے مطابق، رواں سال 31 مئی کو ٹینینسِنگو (Tenancingo) کی میئر نینسی نیپولیز اور ان کی بہن کو ان کے گھر کے قریب سے تین مسلح افراد نے مبینہ طور پر اغوا کر لیا تھا۔ عینی شاہدین کی اطلاع پر پولیس نے فوری کارروائی کی، جس کے نتیجے میں نینسی نیپولیز کو کچھ دیر بعد ہی ایک ویران سڑک سے بحفاظت بازیاب کر لیا گیا۔ ابتدائی بیان میں میئر نے پولیس کو بتایا تھا کہ اغوا کاروں نے رہائی کے بدلے 4 کروڑ پیسو تاوان مانگا تھا اور یہ مشورہ بھی دیا تھا کہ اگر رقم نہیں ہے تو بلدیاتی کونسل کے فنڈز سے ادائیگی کر دی جائے۔ انہوں نے دعویٰ کیا تھا کہ وہ اغوا کاروں کی غفلت کا فائدہ اٹھا کر فرار ہونے میں کامیاب ہوئیں۔

تاہم، کئی ماہ پر محیط گہرائی سے کی جانے والی تحقیقات اور متعدد ملزمان کی گرفتاری کے بعد اس کیس نے بالکل نیا رخ اختیار کر لیا ہے۔ استغاثہ کے مطابق، گرفتار افراد نے اعتراف کیا ہے کہ اس مبینہ اغوا کی اصل منصوبہ بندی خود نینسی نیپولیز کے شوہر اور ان کے بھائی نے کی تھی، تاکہ بلدیاتی خزانے سے 4 کروڑ پیسو بطور تاوان ادا کرنے کا جواز پیدا کر کے پرانی مالی خردبرد پر پردہ ڈالا جا سکے۔

تحقیقات کے دوران یہ حیران کن انکشاف بھی ہوا کہ خاتون میئر کے شوہر اور بھائی نے اس واردات سے قبل مبینہ اغوا کاروں سے تقریباً 150 مرتبہ رابطہ کیا تھا۔ پولیس کے مطابق، ایک آڈیو ریکارڈنگ میں نینسی نیپولیز کے شوہر مبینہ طور پر اغوا کی اس جعلی منصوبہ بندی کے عوض اغوا کاروں کو 28 ہزار ڈالر کی پیشکش کرتے ہوئے بھی پائے گئے۔ پولیس کا کہنا ہے کہ میئر کے شوہر اور بھائی اس وقت مفرور ہیں جن کی تلاش جاری ہے، جبکہ مقدمے کی مزید تفتیش کی جا رہی ہے۔ تاہم، ان سنگین الزامات پر عدالت کی جانب سے ابھی کوئی حتمی فیصلہ آنا باقی ہے۔