میٹا کی فیس بک میں بڑی تبدیلی کی تیاری

دنیا کے مقبول ترین سوشل میڈیا پلیٹ فارم فیس بک کے صارفین کے لیے میٹا ایک بڑی تبدیلی متعارف کرانے کی تیاری کر رہا ہے جس سے ایپ کے استعمال کا روایتی انداز یکسر بدل سکتا ہے۔ میڈیا رپورٹس کے مطابق میٹا کی جانب سے فیس بک کے نئے ڈیزائن اور انٹرفیس کی آزمائش شروع کر دی گئی ہے، جس کے تحت روایتی ٹیکسٹ اور فوٹو پوسٹس کے بجائے فل اسکرین ویڈیو مواد کو زیادہ ترجیح دی جائے گی۔ اس نئے ڈیزائن کی وجہ سے فیس بک کا تجربہ ٹک ٹاک اور یوٹیوب شارٹس سے ملتا جلتا ہو جائے گا۔ کمپنی ابتدائی طور پر اس فیچر کی آزمائش بھارت میں محدود صارفین کے ساتھ کر رہی ہے، جبکہ صارفین کو روایتی ڈیزائن پر واپس جانے کا آپشن بھی دیا گیا ہے۔ پرانی نیوز فیڈ کو مکمل طور پر ختم کرنے کے بجائے ایپ کے نیوی گیشن میں ایک ثانوی ٹیب کے طور پر رکھا جائے گا۔ آزمائش کی کامیابی کے بعد اس نئے ویڈیو فرسٹ ڈیزائن کو مرحلہ وار دنیا بھر کے صارفین کے لیے پیش کیے جانے کا امکان ہے۔