میٹا نے مشہور اے آئی کمپنی خرید لی

فیس بک اور انسٹاگرام کی مالک کمپنی میٹا نے آرٹیفیشل انٹیلی جنس کے شعبے میں اہم پیش رفت کرتے ہوئے سنگاپور کے اے آئی اسٹارٹ اپ Manus کو خرید لیا ہے۔ اس اقدام کو میٹا کے تمام پلیٹ فارمز پر مصنوعی ذہانت کی صلاحیتوں کو مزید مضبوط بنانے کی جانب ایک بڑا قدم قرار دیا جا رہا ہے۔

غیر ملکی میڈیا کے مطابق، اگرچہ میٹا کو حالیہ عرصے میں معاشی چیلنجز کا سامنا ہے، تاہم وال اسٹریٹ جرنل کی رپورٹ کے مطابق یہ ڈیل دو ارب ڈالر سے زائد مالیت میں طے پائی ہے۔

Manus نے رواں برس کے آغاز میں اپنا پہلا ’عام استعمال‘ کا اے آئی ایجنٹ متعارف کرایا تھا، جسے صارفین تحقیق، کوڈنگ اور دیگر متعدد ڈیجیٹل کاموں کے لیے استعمال کر سکتے ہیں۔ کمپنی صارفین کو فیس کے عوض سبسکرپشن سروسز بھی فراہم کرتی ہے۔

میٹا کی جانب سے جاری بیان میں کہا گیا ہے کہ Manus کے اے آئی ٹولز اس وقت دنیا بھر میں روزانہ لاکھوں صارفین کی ضروریات پوری کر رہے ہیں۔ ماہرین کے مطابق اس حصول سے میٹا کو اے آئی کے میدان میں مسابقتی برتری حاصل ہوگی اور اس کے سوشل میڈیا و ڈیجیٹل پلیٹ فارمز مزید جدید اور مؤثر بن سکیں گے۔