میٹا کا سنگاپور میں قائم اے آئی کمپنی مینس کو حاصل کرنے کا اعلان

ٹیکنالوجی کی عالمی کمپنی میٹا نے مصنوعی ذہانت کے شعبے میں اپنی صلاحیتیں مزید مضبوط بنانے کے لیے سنگاپور میں قائم اے آئی کمپنی مینس کو حاصل کرنے کا اعلان کر دیا ہے۔

خبر رساں ادارے رائٹرز کے مطابق یہ اقدام ٹیک انڈسٹری میں بڑھتے ہوئے سخت مقابلے کے تناظر میں میٹا کی اے آئی میں تیز رفتار سرمایہ کاری کی عکاسی کرتا ہے۔ میٹا اس جدید ٹیکنالوجی کو اپنی صارف اور کاروباری مصنوعات میں ضم کرے گی۔

مینس ایک جنرل پرپس اے آئی ایجنٹ تیار کرتی ہے جو ڈیجیٹل ملازم کی طرح کام کرتے ہوئے تحقیق، آٹومیشن اور پیچیدہ امور کم ہدایات پر انجام دینے کی صلاحیت رکھتا ہے۔ یہ اے آئی ایجنٹ مارکیٹ تجزیہ، کوڈنگ اور ڈیٹا اینالیسس میں مہارت رکھتا ہے اور اس کی کارکردگی کو بعض رپورٹس میں اوپن اے آئی کے ڈیپ ریسرچ ٹول سے بہتر قرار دیا گیا ہے۔ کمپنی نے حال ہی میں 125 ملین ڈالر سالانہ آمدنی کا ہدف حاصل کیا۔

اگرچہ معاہدے کی مالی تفصیلات ظاہر نہیں کی گئیں، تاہم میٹا مینس کی سروسز کو چلائے گی، فروخت کرے گی اور میٹا اے آئی سمیت اپنی دیگر مصنوعات میں شامل کرے گی۔ مینس، جو پہلے بیجنگ کی بٹرفلائی ایفیکٹ ٹیکنالوجی کا حصہ تھی، جیو پولیٹیکل خطرات کے پیش نظر چین سے سنگاپور منتقل ہوئی اور اب چین سے مکمل علیحدگی اختیار کرے گی۔ کمپنی نے رواں سال 75 ملین ڈالر کی فنڈنگ بھی حاصل کی تھی۔

واضح رہے کہ میٹا اس سے قبل اسکیل اے آئی میں 29 ارب ڈالر کی سرمایہ کاری کر چکی ہے اور اس کے سی ای او کو بھی اپنی ٹیم میں شامل کیا تھا۔ اس تازہ خریداری سے میٹا کو فوری طور پر اے آئی بزنس میں فوائد حاصل ہونے کی توقع ہے، جبکہ مارک زکربرگ کی قیادت میں مصنوعی ذہانت اب میٹا کی اولین ترجیح بن چکی ہے۔