ویمنز بلائنڈ ورلڈ کپ میں مہرین علی کا کارنامہ ، سری لنکا کے خلاف 230 رنز، تاریخ رقم

ویمنز بلائنڈ کرکٹ ورلڈ کپ میں پاکستان کی مہرین علی نے شاندار کارکردگی دکھاتے ہوئے سری لنکا کے خلاف 230 رنز کی تاریخی اننگز کھیل کر نیا عالمی ریکارڈ قائم کر دیا۔ وہ ویمنز بلائنڈ کرکٹ میں ڈبل سنچری بنانے والی پہلی پاکستانی بیٹر بن گئیں۔

مہرین علی نے صرف 78 گیندوں پر 230 رنز کی دھواں دار اننگز کھیلی، جس میں 39 چوکے شامل تھے۔ انہوں نے 70 گیندوں پر اپنی ڈبل سنچری مکمل کرتے ہوئے ورلڈ کپ کی تاریخ میں نئی مثال قائم کی۔

ریکارڈ اننگز کے بعد مہرین علی نے کہا کہ وہ اس کامیابی پر اللہ تعالیٰ کی شکر گزار ہیں۔ ان کا کہنا تھا کہ وہ یہ اعزاز پاکستان بلائنڈ کرکٹ کونسل، اپنے والدین اور پوری قوم کے نام کرتی ہیں۔

میچ میں پاکستان نے سری لنکا کو 221 رنز سے شکست دے کر ٹورنامنٹ میں اپنی پوزیشن مزید مضبوط کر لی۔ 332 رنز کے بڑے ہدف کے تعاقب میں سری لنکا کی ٹیم 120 رنز پر ڈھیر ہو گئی۔

سری لنکا کی جانب سے میرانی نے 51 اور متیشا نے 29 رنز بنائے۔ پاکستان کی بولنگ میں نور فاطمہ، حوریہ ملک اور سمیرا ملک نے ایک ایک وکٹ حاصل کی۔