ریشم غربت پر لیلیٰ کا مذاق اڑایا کرتی تھی، میرا کا تہلکہ خیز دعویٰ

لاہور: لالی ووڈ کی معروف اور خبروں میں رہنے والی اداکارہ میرا نے اپنی قریبی دوست و فلم اسٹار لیلیٰ کے حق میں آواز اٹھاتے ہوئے سینئر اداکارہ ریشم پر سنگین نوعیت کے الزامات عائد کر دیے ہیں۔

تفصیلات کے مطابق اداکارہ لیلیٰ ان دنوں ایک نجی پاکستانی ریئلٹی شو میں شرکت کے باعث خبروں کی زینت بنی ہوئی ہیں، جہاں ناظرین ان کے انداز اور صلاحیتوں کو داد دے رہے ہیں۔ اسی دوران اداکارہ میرا نے سوشل میڈیا پلیٹ فارم انسٹاگرام پر ایک تفصیلی پیغام شیئر کرتے ہوئے مداحوں سے لیلیٰ کو ووٹ دینے کی اپیل کی اور ان کی زندگی کے تلخ حقائق سے پردہ اٹھایا۔ میرا نے انکشاف کیا کہ لیلیٰ بچپن سے اپنے خاندان کی اکیلی کفالت کرتی رہی ہیں اور انہوں نے حالات کی سختی کے باعث اپنا گھر، گاڑی اور زیورات تک کھو دیے تھے۔

اداکارہ میرا نے الزام عائد کیا کہ اداکارہ ریشم نے لاہور میں تقریباً 20 سال تک لیلیٰ کو شدید پریشان کیا اور ان کی مالی تنگی و غربت کا مذاق اڑایا۔ میرا کے مطابق ریشم نے لیلیٰ کو ان کا اپنا گھر یا گاڑی نہ ہونے پر ہمیشہ نیچا دکھانے کی کوشش کی۔ میرا نے لیلیٰ کو اپنی بہن قرار دیتے ہوئے انہیں ریئلٹی شو کی واقعی ’کوئین‘ اور جیت کی حقدار قرار دیا، نیز دعاؤں کا اظہار کیا کہ وہ اب جلد شادی کر کے ایک پرسکون زندگی گزاریں۔