ادویات کی قیمتوں میں غیرمعمولی اضافہ، مریض شدید مالی دباؤ کا شکار

ملک بھر میں مہنگائی کی لہر نے اب غریب اور متوسط طبقے کے لیے جینا محال کر دیا ہے۔ حالیہ لہر میں مختلف بیماریوں کی ادویات کی قیمتوں میں 100 فیصد سے زائد کا غیر معمولی اضافہ ریکارڈ کیا گیا ہے، جس نے مریضوں کو شدید مالی اور ذہنی دباؤ میں مبتلا کر دیا ہے۔ اینٹی بائیوٹک، پین کلر، شوگر، بلڈ پریشر، معدے کے السر اور الرجی جیسی عام ادویات اب عام آدمی کی پہنچ سے دور ہوتی جا رہی ہیں۔

ذرائع کے مطابق روزمرہ استعمال کی مشہور ادویات بشمول بی وی ڈوکس، سٹروسوڈا، ٹایوور، سربیکس زی، لائسومائٹ لوشن، میٹس اور ڈپریکیپ کی قیمتوں میں بڑا اضافہ ہوا ہے۔ اس کے علاوہ کیریسیف، سیفکس، ازیٹما، ایسی فائل اور گیٹرل جیسی اہم ادویات بھی مہنگی کر دی گئی ہیں۔ سب سے تشویشناک امر یہ ہے کہ ادویات کے مختلف بیچز (Batches) میں قیمتوں کا واضح فرق پایا جا رہا ہے، جس نے ڈرگ پرائسنگ اور مانیٹرنگ سسٹم پر بڑے سوالیہ نشان کھڑے کر دیے ہیں۔

شہریوں نے حکومت اور ڈرگ ریگولیٹری اتھارٹی (DRAP) کے خلاف شدید تحفظات کا اظہار کیا ہے، جبکہ دائمی امراض (Chronic Diseases) میں مبتلا مریضوں کے لیے علاج جاری رکھنا ایک بڑا چیلنج بن گیا ہے۔ طبی ماہرین نے خدشہ ظاہر کیا ہے کہ ادویات مہنگی ہونے کے باعث مریض اپنا علاج ادھورا چھوڑ سکتے ہیں، جس سے عوامی صحت کو سنگین خطرات لاحق ہو سکتے ہیں۔ صورتحال کی سنگینی کو دیکھتے ہوئے ڈرگ لائر فورم نے اس معاملے پر قانونی اور آئینی راستہ اختیار کرنے اور عدالت سے رجوع کرنے کا اعلان کر دیا ہے۔